Abalingisi bagqugquzela ukuzithanda
ABALINGISI beMuvhango bazoshumayela ivangeli lothando kubantu ngomkhankaso wabo omusha i#InMyOwnSkin.
Abalingisi balo mdlalo okhonjiswa ngo-9 ebusuku kwiSABC2 phakathi nesonto, abenza umkhankaso ngoZonke Mchunu odlala indawo ka-Imani, Sharon Seno onguMarang, Buhle Samuels olingisa indawo kaMatshidiso noBukamina Cebekhulu onguGugu.
Laba balingisi bazohambela izindawo ezahlukene begqugquzela abantu ukuthi bangazenyezi ngobubona kepha bazithande.
Umsunguli womdlalo, uDuma KaNdlovu, uthe ngalo mkhankaso bafuna ukukhumbuza abantu ukuthi bazethembe futhi bazithande.
“Ngalo mkhankaso sifuna ukugqugquzela amantombazane amancane avela kuzo zonke izinkalo ukuthi azithande enjalo,” kusho uDuma. Uthe abesifazane abaningi abancane abazethembi futhi baphathwa wukhwantalala ngenxa yokuthi banokuzingabaza okudalwa yindlela ababukeka ngayo.
Uthe bafuna ukuthi abesifazane bangathembeli kwabanye abantu ukuthi bazithande.
Ngale kwalokhu uthe lo mkhankaso bahlose ngawo ukugqugquzela abantu besilisa ukuthi bathande abesifazane benjalo.
UZonke uthe ufuna bazibone ubuhle babo, amandla abanawo futhi babone ukubaluleka kwabo, bangabheki ukuthi abantu babathatha kanjani.
UBukamina uthe: “Ngenye yezinto engizithandayo ukufundisa amantombazane ukuthi awashodi ndawo nokuthi ubalulekile ngisho ngabe uphumaphi. Amantombazane kumele asekane.”