Injobo izothungelwa ebandla engqungqutheleni yowokholo
KUZODINGIDWA ngezihloko ezahlukene ezithinta umculo wokholo engqungqutheleni yokucobelelana ngolwazi, iGospel and Christian Church Music Indaba, ezoba se-Oceanic Hotel (Lavita) eThekwini ngoMashi 5.
Umhleli wale ngqungquthela, uSipho Malembe, uthe ziningi izihloko okumele kukhulunywe ngazo ezithinta umculo ezihlanganisa nendlela yokuziphatha.
“Kumele kukhulunywe ngokuthi umculi uculela bani nokuthi uziphatha kanjani. Abafundisi ikakhulukazi uma kuyiPhasika bayakhala ngokuthi abanye bafika sebediyazela sebephuzile abanye bangafiki nhlobo, uzwe kuthiwa kade besezindaweni ezithize. Yinto ekhona eyaziwayo leyo,” kusho uSipho.
Uthe ubize le ngqungquthela ukuze kube khona ubumbano phakathi kwabaculi bowokholo namabandla.
“Mina ngiwumculi futhi ngiwufundele ngaze ngathola iziqu zobudokotela kuwo. Esontweni ngaqala ngineminyaka eyisithupha ngathola nobizo lobufundisi.
Ngisebenza emabandleni ahlukene ngendaba yomculo. Ngibonile ukuthi iyashoda inkundla yokuxhumana phakathi kwabefundisi, ibandla nabaculi bowokholo. Namanje uthola amabandla enomculi oshayayo, ifike iJoyous imthathe bese kusuka impi.”
Uthe ngokocwaningo amaKhrestu abalelwa ku-80% eNingizimu Afrika.
“Umculo wokholo yiwo odayisa kakhulu okwedlula eminye. Uma amabandla engasebenza nabaculi ukukhangisa umculo wabo ungaba khona umehluko.
“Inkundla ikhona kodwa ayikho semthethweni kahle. Kumele amabandla abambisane nabaculi ngokudayiswa komculo kwaziwe nje ukuthi uma uya ebandleni elithile uzokwazi ukuthola umculo wobani.”
Uthe ezinye izikhulumi ezizobe zikhona ngoPastor Ncanda, Babo Ngcobo, usomabhizinisi obuye abe ngumphathi wabaculi uNhlanhla Khambule nezinye.
Uthe kuzoqalwa ngo-6 ntambama futhi kungenwa mahhala.
Uthe bafuna ukuba nalezi zinkundla kane ngonyaka ezindaweni ezehlukene.