UVusi usepheka abasakazi abasafufusa
IZINKUNDLA zokuxhumana zifike zalekelela emisebenzini yabanye kodwa kwabanye ziyaphazamisa.
Ubukhona bazo sebuzale ababizwa ngama-influencer abasetshenziswa yizinkampani ukumaketha imikhiqizo bese bekhokhelwa.
Ingwazi yezokusakaza uVusi Letsoalo ithe izinga lomsakazo alisafani nakuqala ngenxa yazo izinkundla zokuxhumana.
“Umsakazi akasaqhamuki nento yakhe kanti kumele aqhubeke abe nento ayicabangayo. Kumele kube nguye ophakela izinkundla zokuxhumana hhayi ukuthi kube yizo athola kuzo izinto,” kusho uVusi.
UVusi uqale ukusakaza kwiMetro FM ngo-1992. Uthe wayengenamava kwezokusakaza kodwa enothando.
“Ngaqeda ukufunda eNkamana eFilidi ngasebenza esibhedlela iChris Hani Baragwanath. Yilapho engahlangana khona noDkt Victor Ramathesele. Wangixhumanisa nomsunguli weMetro FM uKoos Radebe ethi kunensizwa ethanda ukusakaza. Ngangena kanjalo,” kusho uVusi.
Uthe ubebukela kubasakazi okubalwa kubo uTreasure Tshabalala, Lucky Ntuli, Lawrence Dube, VVO Mkhize noKansas City.
“Ngangena kwiMetro ngiphuma emgwaqweni. Uma unekhono nesifiso nothando, ayikho into engenzeki.”
Ngemuva kweMetro usakaze kwiP4 Radio esibizwa ngeGagasi nakwiVuma FM, akuyona manje.
Uthe yize ukusakaza esakwenza kodwa into ebaluleke kakhulu kuye ukuqeqesha abasakazi bangomuso.
Yingakho eminyakeni eyisithupha edlule esungule isikole sokusakaza, iLetsoalo Broadcasting Academy, ezinze eBat Centre, eThekwini.
“Ngifuna ukudlulisa ulwazi ngifundise abantu abasha ukuze ngilalele ngizwe ukuthi yiyona ndlela yokusakaza le. Singezwa abantu abazohleka ekuseni kuze kushone ilanga. Esikoleni akumina ngedwa kodwa ngilanda nabanye abasezingeni eliphezulu baqwashise abezayo ukuthi ukuba umsakazi yini okumele ayazi.”
Uthe ufisa ukuthi isikole sakhe sikhule sisabalale nakwezinye izindawo njengaseMgungundlovu, Mpangeni nasePort Shepstone.
“Kusasele amandla okwenza ngoba asinaxhaso ngaphandle uma kukhona osixhasayo noma ofuna ukusebenza nathi. Igenge yakithi ayikholelwa ekusebenzeni nabanye ezindaweni eziningi. Ngisho eGoli bayasifuna ngakho yiyona nto engiyizamayo kulo nyaka.”
Uthe ukufundisa abanye yinto ayithanda kusuka kudala. NoChilli M ongasekho kwavela ukuthi waphekwa nguye.
“Waphekwa yimi, yishwa nje ukuthi uNkulunkulu washeshe wambiza. Abanye bazozisholo bona angazi ngingabala ngithini.”
UVusi ongashadelwe futhi ongenayo ingane uthe isikole yiso agxile kusona kakhulu.
“Angazi lutho ngebhola, ngazi uDoctor Khumalo kuphela. Ngisiza abafundi bami noma ngipheke okanye ngihlanze indlu.”
Uphethe ngokukhipha iseluleko sokuthi abantu kumele bangazikhukhumezi uma befuna ukuphumelela.
“Siyafana sonke ngoba sidalwe ngumuntu oyedwa. Zihloniphe, kuzoba lula ukuhlonipha nabanye.”