Kufezeke iphupho ku-Ayanda osezothula uhlelo kwithelevishini
UMCULI wokholo waKwaZuluNatal u-Ayanda Ntanzi usemenyezelwe njengozoba umethuli wohlelo oluthungatha amakhono entsha yaseThekwini, iGospel Icon Discovery Talent Search.
Le nhlolokhono eyenziwa uMasipala waseThekwini ithungatha intsha enekhono endimeni yomculo wokholo.
Inhlolokhono yalo nyaka iqale ekupheleni kukaJanuwari kanti izovalwa maduzane njengoba sekusele ukuthi bahambele amalokishi amane eThekwini.
U-Ayanda ophinde abe yijaji njengoba kusathungathwa ikhono, uzokwethula lolu hlelo esiteshini esidlala umculo wokholo i -One Gospel ekhonjiswa kuDStv (331).
Ekhuluma ngokuthola leli thuba u-Ayanda, uthe kube yinselelo emjabulisayo njengoba ebengafuni nje ukwaziwa njengomculi wokholo kodwa kuningi akade efuna ukukwenza.
“Into ebengingacabangi ukuthi izoqhamuka nje maduzane kodwa ngijabule ukuthi sengizokwenza enye yezinto eziyiphupho lami. Osekusele ukuthi ngingene emkhakheni wokulingisa njengoba nawo ngiwuthanda kakhulu,” kuchaza u-Ayanda.
Uthe intsha ezoba nenhlanhla yokufinyelela esigabeni sokugcina salolu hlelo angayikhuthaza ukuthi ihloniphe abantu ezobe isebenza nabo asebenamava kulo mkhakha.
“Ukuhlonipha umsebenzi owenzayo nabantu osebenza nabo kungakubeka kude empilweni. Ngakho nami ngingayidonsa ngendlebe nje intsha esizoyithola eThekwini ukuthi isebenze kanzima bese yenza konke etshelwa khona,” kuchaza u-Ayanda.
Ozodla umhlanganiso kulolu hlelo uzohamba nomklomelo onguR100 000, ozothatha indawo yesibili uzohamba noR20 000 kuthi othathe eyesithathi athole uR10 000.