Intsha emcimbini wezobuciko wekhethelo
INTSHA yaKwaZulu-Natal ithole ithuba lokuyomela isifundazwe engqungqutheleni yezobuciko eKapa.
Laba bantu abasha bazobe bekhombisa ngobuciko babo engqungqutheleni iDesign Indaba ezokuba se-Artscape Theatre, eKapa.
I-Design Indaba, kuhloswe ngayo ukukhuthaza abantu abasendimeni yezobuciko ukuthi bakwazi ukuphila ngabo.
Ingenye yezingqungquthela ezinkulu zobuciko emhlabeni jikelele.
Kwabanye abakhethiwe ukuba babe yingxenye yengqunguthela kukhona uMnuz Siyanda Magaba (27), oyi-Interior Designer, ozwakalise okukhulu ukujabula ukuba yingxenye yabazobe bekhombisa ngobuciko babo.
“Ngizimisele ukufunda lukhulu kule ngqunguthela nokuveza ikhono lami ukuthi umhlaba wonke ulibone futhi ngikhuthaze izingane ezinothando lobuciko ukuthi zingavumeli abantu bazivimbe ekufezeni amaphupho azo,” kusho uMagaba.
Le ngqungquthela yasungulwa ngonyaka ka-1995 kanti ihanjelwa ngabantu abaphuma emazweni ahlukene ukuzokhombisa ngobuciko babo.
Kwabanye abayingxenye yengqungquthela, kukhona uNksz Nombuso Khanyile, ongomunye wabasunguli benkampani, i-Afrikan Passion Designs, eyenza izimpahla zesikhumba besebenzisa izimpahla ezindala.
Lo mbuthano uhanjelwa ngabantu abasemikhakheni eyahlukene kwezobuciko, okubalwa kubo uMnuz Bas Timmer odabuka eNetherlands, Nhlanhla Mahlangu wakuleli ongumlingisi ovelele kwezeshashalazi noSho Madjozi ongumculi osezakhele udumo emhlabeni ngezingoma zakhe eziqhakambisa imvelaphi yakhe.