Simisiwe isiteleka sothisha
SIBUYELE kwesejwayelekile isimo sokufunda nokufundisa ezikoleni eziwu-12 KwaMpumuza naseSweetwaters, eMgungundlovu, ngemva kwesiteleka sothisha ekuqaleni kwesonto.
Othisha abangaphansi kwenyunyana iSadtu baye bephindelela emahhovisi oMnyango wezeMfundo eMgungundlovu, behambisa incwadi enohlu lwezikhalo kumqondisi. Okunye abebekhala ngakho ukubuyiselwa esikhundleni kukathishomkhulu waseSweetwaters Primary, obemisiwe.
Wamiswa ngekota yesibili ngonyaka odlule wayiswa kwesinye isikole ukuze ayoqeqeshelwa ukuphatha. Ubuyiselwe emsebenzini ekuqaleni kukaFebhuwari nonyaka. Othisha abayisikhombisa bamsola ngokuphatha ngesandla sensimbi nokwenzelela. Kodwa isigungu esilawula isikole sisola othisha abayisikhombisa abangamfuni uthishomkhulu, ukuthi balwa izimpi zabo.
Unobhala weSadtu eSweetwaters uMnuz Sikhumbuzo Ngubane, uthe bayihoxisile imibhikisho ngoba udaba selungenelwe wuMnyango wezeMfundo esifundazweni.
UNgubane uthe bebezoba nomhlangano izolo ebusuku nomnyango.
“Othisha abayisikhombisa baseSweetwaters bathi abazimisele ukubuyela esikoleni anduba ziyaxazululwa izinkinga zabo. Amalungu athe akulungele ukubuyela esitelekeni uma singanakwa kwesikufunayo,” kusho uNgubane.
NgoLwesibili othisha bakhishwe ngoshova ngamaphoyisa emahhovisi omnyango, bahamba befungile ukuthi bazovala izikole ngaphansi kwesekethi i-Edendale, nebala benze njalo ngoLwesithathu. Babekade bekhishelwe ngaphandle kwamasango ngenxa yokucima kukagesi, bacula kakhulu bebanga umsindo ngoba befuna ukunakwa ngabakuzele emahhovisi. Babuye ngoLwesithathu sebengamakhulu befuna umqondisi. Bebengena isikole ngasinye bekhipha amalungu abo baqonda nawo kumqashi.
Okhulumela uMnyango wezeMfundo KwaZuluNatal uMnuz Kwazi Mthethwa uthe baxoxa nawo wonke umuntu othintekayo ukuze baqhamuke nesixazululo.
UMthethwa uthe bahlale bekwenza ukuxoxisana nazo zonke izinhlaka ezisuke zingaboni ngaso linye kukhulunywe, kutholwe isisombululo.