UKekana ufunwa yizingqungqulu
UKUBAMBA iyeka iMamelodi Sundowns ekukhuphuleleni ukaputeni wayo umholo sekuholele ekutheni kube namaqembu amabili adlala kwi-Absa Premiership, afuna ukumsayinisa.
Leli phephandaba lithole ukuthi iSuperSport United neBidvest Wits bamfuna uthuli uHlompho Kekana ephelayo inkontileka yakhe kwiSundowns, ekusongweni kwesizini.
Ngokusho komthombo, la maqembu aseke axhumana noThulani Thuswa, ophethe izindaba zikaKekana, oyibamba kuthule umoya enkabeni yesisu.
Phambilini, phakathi kuka2008 no-2010 lo mdlali odume ngokukhahlela izinguzunga zamagoli, uke wadlala kwiSuperSport eqeqeshwa uGavin Hunt, osecija iWits.
Ngokusho komthombo osondelene nomdlali, la maqembu athembisa uKekana izulu nomhlaba. Nokho uThuswa kuvela ukuthi uwatshelile amaqembu amfunayo ukuthi kuzoba nzima ukuthi amthole ngoba inhliziyo yakhe isekwiSundowns futhi uzimisele ukugugela kuyona. Kuvela igama laMatsatsantsa a Pitori nje, kunemibiko ethi injini yawo esiswini, uDean Furman, ibuyela e-United Kingdom (UK) ekupheleni kwesizini. Ukungaphumeli obala kweSundowns ngesicelo sikaKekana, yikona okubambe ukuthi avuselele inkontilela yakhe. Kuthiwa lo mdlali ukhala ngokuthi ayimfanele imali ayiholayo, ekubeni engukaputeni. Ufuna ukuba kwiTop 5 yabadlali abayikha ngamafosholo eChloorkop. Kunanemibiko ethi ngeholo uhlulwa ngabadlali abanjengoAnele Ngconga, Denis Onyango,
Sibusiso Vilakazi no-Andile Jali.
“Impela iSuperSport United neWits sebeke baxhumana noThuswa ngokufuna uKekana. UThuswa ukhuluma nabaqeqeshi uqobo, uHunt noKaitanio Tembo.
La maqembu abukeka ethatha amashansi ngenxa yakho lokhu kungaphumeli obala kweDowns ukunyusela uKekana iholo. Phezu kukuba ethembisa okuhle nokho uThuswa uwatshelile ukuthi izingxoxo neDowns zisaqhubeka. Hheyi yibhola leli, wubani owaziyo, mhlawumbe angaphelela kwelinye lalamaqembu,” kubeka umthombo.
Umthombo uveze nokuthi ithemba likaThuswa selikuPitso “Jingles” Mosimane ocija iDowns, ekutheni abancengele ezikhulwini. Kuthiwa balinde ukuthi lo mqeqeshi naye aphothule udaba lwenkontilela yakhe.
Kuthintwa uThuswa, ukuvumile ukuthi akhona amaqembu afuna uKekana kodwa wanqaba ukuveza amagama awo.
Mayelana nodaba lomholo kaKekana uthe: “Eish! mfowethu angisazi ukuthi ngithini ngalolu daba. Ngicela uthinte yona iSundowns.”
UShupi Nkgadima okhulumela iSundowns, uthe: “Udaba okhuluma ngalo luphakathi kweqembu nomdlali. Ngabe kasenzi ubulungiswa uma silukhuluma kwabezindaba.” Phakathi kwezinkomishi esezinqotshwe yilo mdlali, odabuka eLimpopo, yizicoco ezine ze-Absa Premiership, ezimbili zeTelkom Knockout neseCAF Champions League, ukusho ezimbalwa.
NgoDisemba, uKekana uhlonishwe ngesithombe esinejezi lakhe ngenxa yokufinyelela emidlalweni ewu300 kwiDowns.