Owe-United ubusiswe wukuhlala ebhentshini
UMDLALI weMaritzburg United uTebogo “Messi” Tlolane uthi ukuphenduka isibukeli kwiOrlando Pirates embolekise kwiTeam Of Choice, kumkhulise kakhulu ngokomqondo, nathi usekwazi ukumelana nayo yonke inhlobo yezingqinamba kunobhutshuzwayo.
UTlolane ogqame ebholeni elikhokhelayo esagijimela iJomo Cosmos, utshele izintatheli izolo ukuthi ukudonsa kanzima kweZimnyama kumkhulisile kakhulu, wathi lokho kwenze washesha wajwayela kwiMaritzburg.
Ngokusho kwalo mdlali oke wagijima nakwiChippa United, iziyalo azithole ku-Ephraim “Jomo” Sono, zimqinise idolo ngezikhathi ezinzima izinto zingahambi kahle kwiPirates. UTlolane akapheli esikimini sika-Eric Tinkler muva nje, kangangoba uyidlale yomibili imidlalo lapho khona iMaritzburg ishiye kukhalwa eGoli ibuya namaphuzu ayisithupha kwiBidvest Wits neKaizer Chiefs.
“Uma udlalela iqembu elithathwa njengelincane kuleli kunezinto njengomdlali oke ungazinaki ngenxa yokuthi amaqembu anezimfuno ezingafani. Nokho uma uke wafika eqenjini elikhulu njengePirates, umqondo wakho kufanele uguquke ngokushesha ngoba kufuneka izicoco futhi nengcindezi inkulu. Angicabangi ukuthi njengoba bengingadlali kwiPirates yingoba ngingumdlali obhedayo, kepha yingoba ithuba belingakafiki. Ngiyambonga noSono ngoba kwathi noma kungahambi kahle kwiBucs, wahlala nami phansi wangitshela ukuthi ngingumdlali omuhle, ikusasa lami liqhakazile. Ngisazithola izingcingo nakubantu bePirates bengeseka,” kusho uTlolane.
Namuhla iMaritzburg idlala neStellenbosch FC emdlalweni we-Absa Premiership ozoba seHarry Gwala Stadium, ngo-8 ebusuku.
Uma ezikaTinkler zinganqoba lo mdlalo, zizokhuphukela endaweni yesine kwi-log. UTlolane uthe uTinkler ubadonse ngendlebe ukuthi kumele nakanjani beyinqobe imidlalo imithathu elandelayo, ngoba lokho kuyobe kusho ukuthi leli qembu seliphakathi kwiTop 8.
“Umqeqeshi usitshelile ukuthi uma sinqoba imidlalo yethu emithathu elandelayo ngeke sisaphuma kwiTop 8.
“Sibheke ukwenza kahle kwiligi kwazise sesiphumile vele nakwiNedbank Cup,” kulandisa uTlolane.
Lo mdlali uthe ukujabulela kakhulu ukuthi uzodlala eHarry Gwala ngoLwesihlanu ngoba inkundla igcwala phama. “Ngingakafiki kwiMaritzburg, uKeagan (Buchanan) wangitshela ukuthi lisuke libhubha uma sidlalela ekhaya ngoLwesihlanu ngoba abalandeli bayaseseka futhi baphuma ngobuningi babo. Ngesikhathi sengizibonela sidlala neCape Town City kwakungathi ngidlala kowomkhaya ngendlela nje okwakuyiyona,” kusho uTlolane.