Ukhala ngobubi benkundla e-Egypt
UMQEQESHI weMamelodi Sundowns, uPitso Mosimane, ukhala ngobubi benkundla yokuziqeqesha abayinikwe e-Egypt ngaphambi komdlalo womlenze wokuqala wama-quarterfinal e-CAF Champions League ne-Al Ahly kusasa ntambama.
ISundowns ifulathele iNingizimu Afrika ekuqaleni kwesonto ukuyoqala amalungiselelo omdlalo wokuzicijela umdlalo obhekwe ngabomvu e-Afrika yonke.
Isizathu esenza umdlalo ubhekwe kakhulu wukuthi nyakenye iSundowns ibukise nge-Al Ahly iyixebula ngo 5-0 kowomlenze wokuqala wamaquarterfinal odlalelwe kuleli. Akubuzwa ukuthi izofuna ukwenza konke ukubuyisa isithunzi sayo.
Nakuba uMosimane ehlale ethi bazijwayele izinselelo nempatho ehambisana nokudlala kwiChampions League kodwa ukhihle esikaNandi ngenkudla abanikwe yona.
“Samukelwe kahle, saziqeqesha ePetroSport Stadium okuyinkundla esinomlando omncane kuyona.Yilapho esidlale khona neZamalek esigabeni samaqoqo, sidlale khona futhi neLibya emidlalweni yokuhlunga (Bafana Bafana). Ngakho siyijwayele inkundla kodwa seyonakele. Kodwa basinike okungcono abakwazile ukukuthola. Inselelo isenkundleni ngoba asiside isikhathi kudlalwe i-Africa Cup of Nations kuyona. Angazi ukuthi kwenzekani. Mhlawumbe inkundla isisetshenziswe kwaze kweqa ngoba maningi amaqembu lapha. Angazi. Bengilindele ukuthi inkundla ibe sesimeni esihle. Kodwa siziqeqeshe kunjalo,” kusho uMosimane.
ISundowns iqede eqhulwini kuGroup C, ishiya ngemuva izimbangi zayo ezinkulu iWydad
Casablanca yaseMorocco. Kodwa ingase izifice zigawulwe zabekwa kwi-Al Ahly esayiwine yonke imidlalo ewu-16 yeligi kwi-Egyptian Premier League kule sizini.
“Sibe nesikhathi sokubuka ivideo sicubungula iqembu esizodlala nalo ukuthi lingobani, liqine ngakuphi nokuthi yikuphi okulenza libe yingozi. Besisebenza ngodonga lwethu nokuthi bona bamandla kangakanani uma kuhlaselwa.”