UThongathi lukhalaza ngokudlaliswa kude nekhaya
IZIKHULU zoThongathi FC zishaya amakhala ngenkundla leli qembu elizodlalela kuyona umdlalo weGladAfrica Championship kusasa.
UThongathi luzobhekana ne-University of Pretoria kusasa ngo-3.30 ntambama, eChatsworth Stadium, eThekwini.
Ngokwejwayelekile iCane Cutters ijwayele ukudlalela ePrincess Magogo Stadium okuyinkundla yayo yasekhaya, uma ingekho esimeni esihle iyaye idlalele eSugar Ray Xulu Stadium.
Nokho ngenxa yokuthi iLamontville Golden Arrows izobe ibhekene neHighlands Park kowe-Absa Premiership khona belu kusasa, lokhu kuphoqe ukuthi uThongathi lusebenzise enye inkundla.
“Abeneme abaphathi ngokuthi bashovelwe eChatsworth Stadium, bakhala ngokuthi kukude kakhulu futhi kufana nokuthi badlalela ekuhambeni ngoba yinkundla abangayijwayele. Iqembu lithole incwadi evela kuMasipala weTheku ebibazisa ukuthi iPrincess Magogo Stadium ayikulungele ukusingatha lo mdlalo ngoba imazombezombe ngenxa yomdlalo wangempelasonto edlule kwiNedbank Cup. Kuthiwa iMagogo kumele ivalwe okungenani isikhathi esingangamasonto amabili,” kusho umthombo.
Njengamanje uThongathi lujaha isicoco seGladAfrica Championship.
ICane Cutters isendaweni yesibili kwilog yeGladAfrica ngamaphuzu angu-37, emidlalweni engu-21.
UNkosinathi “VB” Chili okhulumela uThongathi, uthe akwehli kahle impela ukuthi bayodlalela ekudeni nasekhaya kodwa wathi isimo abazithola bekusona njengeqembu abakwazi ukusilawula.
“Uma sekuyilesi sikhathi sesizini udinga yonke into ongayisebenzisa ukuze unqobe imidlalo. Iphuzu nephuzu libalulekile. Lona ngumdlalo wethu wasekhaya, okufanele engabe siwudlalela enkundleni yethu esiyijwayele ngoba sijaha nesicoco seGladAfrica Championship. Kodwa ngeshwa lokho akwenzeki ngenxa yokuthi iMagogo isiphenduke inkundla yemiqhudelwano, ekubeni thina siyibhalise ngenkundla yethu. Ngiyafisa ukunxenxa abalandeli bethu ukuthi babekezele, akukho esingakwenza. Sekuyazwela impela ukuthi asinayo inkundla oThongathi ethi thina,” kubalisa uChili.
ULunga Lamula owengamele izinkundla eThekwini, uthe kuyiqiniso ukuthi ivaliwe iMagogo, kodwa wathi yinto yesikhashana nje.
“Uzokhumbula ukuthi le nkundla ibivaliwe, sase sathi ake siyibheke ukuthi isikulungele yini ukudlala emqhudelwaneni iNedbank Cup ngempelasonto edlule. Kucacile ukuthi kusenezindawo ebezingakalungi kahle, sakhetha ukuthi siphinde siyivale. Yinto nje yesikhashana, mhlawumbe kuzoba ngamasonto amabili nje kwaphela,” kucacisa lesi sikhulu.