USteve Komphela ufuna amaphuzu athi awabe wu-10
UFUNA ukuqoqa amaphuzu athi awabe wu-10 kwabasazowadlalela umqeqeshi weLamontville Golden Arrows, uSteve Komphela, athi kuzobasiza ukuqinisa indawo yabo emaqenjini ayisishiyagalombili azoqeda ephezulu kwi-Absa Premiership ekupheleni kwesizini.
UKomphela ukusho lokhu ngoba ekholwa wukuthi amaphuzu awu40 enele ukuthi bathole le ndawo. Sebeqoqe awu-30 emidlalweni ewu-21, ababeka endaweni yesishiyagalombili.
Ufisa ukuthi amaphuzu baqale ukuwaqoqa uma sebedlala neHighlands Park kusasa eSugar Ray Xulu Stadium, eClermont, ngo-3.30 ntambama.
“Ukuya emdlalweni niwazi amaqhinga enizowasebenzisa kuyingxenye yomdlalo kodwa futhi lokho kungenzeka kungasebenzi njalo. Okuzodingeka wukuthi lona wumdlalo ozobe udle ngezikhwepha. Siyayazi iHighlands Park idlala ibhola elinejubane, iyalwa. Asazi ukuthi ukudlala kwabo imizuzu ewu-120 emvuleni kuzobaphazamisa kanjani. Kodwa futhi kwiHighlands Park kungenzeka kungasho lutho lokho ngoba bayiqembu elizikhandlayo,” kusho uKomphela.
Ngempelasonto edlule iLions of the North idlale neKaizer Chiefs koweNedbank Cup Last 16, yaze yayonqoba kumaphenathi.
Kodwa uKomphela uyakuqonda ukuthi nalo iqembu lika-Owen Da Gama lizofika emdlalweni we-Arrows likwazi ukubaluleka kwamaphuzu amathathu.
“Siyalingana nabo ngamaphuzu. Nabo bafuna ukuqinisa indawo yabo kwiTop 8 njenganathi. Kuzoba wumdlalo onzima, silwela amaphuzu amathathu. Inhloso yethu wukuthi emaphuzwini awu27 esisazowadlalela, okuyimidlalo eyisishiyagalolunye, sifinyelele okungenani emaphuzwini awu-40. Ngicabanga ukuthi amaphuzu awu40 azokufaka kwiTop 8,” kubeka uKomphela.
Uthe kuyamjabulisa ukubona iqembu elakhiwe ngabadlali abanye ebebengaziwa libanga iTop 8. Ngesizini edlule i-Arrows iqede endaweni ka-10 ngamaphuzu awu-36.
“Bayakhula (abadlali). Akekho obazi ngoLindokuhle Mtshali, (Ntsako) Makhubelo noSifiso (Mlungwana).