Azibulalane kowabakhaya ohluliwe emukele induku
NGIKE ngazithola ngiphenduphenduka embhedeni ezintathakusa kuthangi, kwacaca ukuthi ubuthongo sebuvele banquma ukushaya isiteleka semvelo, bangihlamuka.
Akuyona-ke into emnandi ukuzithola uqwashile, ucabanga into engekho, ekubeni wazi kahle ukuthi bazobe bekulindele etohweni emahoreni ambalwa. Akukuhle futhi kushayisa namahloni ukuthi uzithole sewungquphaza emsebenzini, usho ukudoba izinhlanzi ezibonwa uwena kuphela.
Kuthe uma kufika lesi siteleka semvelo ebesenziwa wubuthongo, nganinga ukuyovula ithelevishini ukugwema ukucabanga kuze kweqe. Phela uma uqwashile uke uwine i-lotto, uthenge ubhazabhaza womuzi, ushaye ngonyanyavu lwenqola (imoto), ushadelwe ngomuhle unkosikazi lo...maye kunzima okucatshangwa uma umuntu eqwashile.
Nokho angibanga yisigwili ngesikhathi ngiqwashile kuthangi kunalokho ngizithole sengicabanga ngomdlalo wakusasa wabakhaya, phakathi kwe-Orlando Pirates neKaizer Chiefs.
Ngesikhathi ngithatha ngibeka ngokungase kwenzeke kusasa kowabakhaya, akufikanga nhlobo ukuthi kazi yiliphi iqembu elizowina kodwa kufike umbuzo othi: kazi yimuphi unompempe ozobe edlalisa?
Ngicabanga ukuthi enhliziyweni yami ngishaywa oluncane uvalo lolu uma ngicabanga ukuthi umdlalo wabakhaya wakusasa ubaluleke kanjani.
Ngazi kahle ukuthi imimoya izophakama kusasa kubadlali nabaqeqeshi, kuye kukapakele nakubalandeli kanti lokhu kuzodinga ukuthi unompempe ozobe ephethe umdlalo aqine, akhombise ukuthi uyawazi umsebenzi azobe ewenza.
Kunzima kakhulu ukuphatha umdlalo wabakhaya baseSoweto, ikakhulukazi ngoba lona wakusasa ungase ucacise izinto eziningi.
Ngaphandle nje kokuqhoshelana kwabalandeli kuyaziwa ukuthi womabili la maqembu ayawadinga amaphuzu ngoba angase asho lukhulu ngozothatha isicoco seligi ekupheleni kwesizini.
Njengoba ngiloba lapha nje okufika emqondweni yindlela abashaya ngayo udaka onompempe bethu selokhu kuqale isizini.
Empeleni nangesizini edlule udaka bekuyinto yabo nje. Uyazi nje akekho unompempe engimethembayo njengamanje ngoba bonke sebenze amaphutha akushiya ubambe ongezansi uma uthamele umdlalo.
Esingakudingi kusasa wukuthi kube nezidubedube ezingezinhle ezingadalwa wukuthi unompempe uthathe izinqumo okungeyizo.
Ngendlela abenza ngayo amaphutha onompempe bethu ungaze ufunge ukuthi banenkinga yamehlo nomake bangena enkundleni bedle amponjwana. Akudingeki konke lokho uma kudlala iPirates neChiefs ngoba vele ukungcofana nokuklolodelana kuqala kusasele inqwaba yamahora ukuthi umdlalo uqale.
Awadingeki amaphutha lapha ngoba kuyokhulunywa kuze kubuye leyo ndoda okwathenjiswa ukuthi iyobuya ngelinye ilanga, kubangwa ukuthi isinqumo esithile besifanele yini noma unompempe ushaye lolu daka lwabo asebekhonzile ukuludavuza.
Ngazi kahle ukuthi kunzima nakwiSouth African Football Association (Safa) ukuqoka unompempe ozophatha lo mdlalo kusasa.
Nokho akukho ukujikela emuva kwendlu ngoba kumele nakanjani udlale owabakhaya eFNB Stadium kusasa ntambama.
Ngesikhathi kunomdlalo wabakhaya ngonyaka odlule kwahlala obala okwempahla yentshitane ukuthi unompempe owayedlalisa wayenengcindezi enkulu. Angifuni nokuphindela ekutheni kwakhulunywa ngephenathi eyatholwa yiChiefs umdlalo usuzophela, kwacishe kwaphela inyanga yonke. Nami ngayibona ukuthi yayishayisa amakhala impela leya phenathi.
Kusasa okubalulekile wukuthi abalandeli bangakhushukelwa yimimoya kakhulu ngoba phela ekugcineni ibhola umdlalo nje, akufi muntu uma iqembu lakho lihluliwe.
Ngihlale ngikusho ukuthi abadlali bebhola babukeka bexabana enkundleni kodwa uma sekuphele umdlalo ubathola bendawonye bezishayela iziphuzo. Bayakuqonda ukuthi ibhola liwumdlalo nje, akukho okungale.
Sengiyaphetha manje futhi angifuni ukuzwakala sengathi ngiluleka abantu ngendlela yokuziphatha enkundleni ngoba nakhu ngazi kakhulu ngonobhutshuzwayo.
Nokho kuyisifiso sami sangempela ukuthi kusasa konke kuhambe kahle emdlalweni wabakhaya, kuthi labo abazokwehlulwa bayamukele induku.
Mhlawumbe uma kuhambe kanjalo ngeke ngiphinde ngizithole ngiphenduphenduka embhedeni sesihlasele isiteleka semvelo. Azibulalane eFNB Stadium, kusasa, kufe ofayo.