UMazinyo usola induku emqubeni
UKUBE umdlalo wabakhaya baseSoweto i-Orlando Pirates neKaizer Chiefs owamankomane, ubungawufanisa nowosondonzima.
Ngokwejwayelekile uma kuzoba nezimpi amabhokisa aba nesithangami nabezindaba lapho esuke esho ukuthi ayilungiselele kangakanani impi. Okuye kugqame ngamabhokisa wukuthi awasabi ukusho ukuthi azoyigingqa phansi imbangi, yilowo nalowo echoma ngamagalelo akhe.
Kuyaye kuphele sezifuthelana impela lezi zinkunzi kucaca ukuthi zifisa engabe seziseringini.
Izolo eGoli kube nesithangami nabezindaba ngaphambi komdlalo wabakhaya okusasa eFNB Stadium ngo-3.30 ntambama.
Yilapho umqeqeshi weChiefs u-Ernst Middendorp ekubeke kwacaca ukuthi “wumbhedo” indaba yokuthi abePirates bathi abaziboni besembangweni wesicoco se-Absa Premiership.
Kuyiwa emdlalweni la maqembu ehlukaniswe ngamaphuzu ayisithupha.
I-Chiefs iqhwakele kwi-log ngamaphuzu awu-45 kuthi iPirates ihlale endaweni yesithathu. I-Mamelodi Sundowns esendaweni yesibili ayidlali kwiligi kule mpelasonto, okusho ukuthi uma eZimnyama zingawina zinganyukela endaweni yesibili kwi-log bese ziba ngemuva ngamaphuzu amathathu ezimbangini zaseSoweto.
Kuleli sonto wonke umuntu wePirates obebuzwa ngethuba layo lokunqoba isicoco ubephika alale ngomhlane. Kusukela kwiphini lomqeqeshi uFadlu Davids, wukaputeni uHappy Jele nonozinti uWayne Sandilands, bebethi nje bona bazibhekele amaphuzu amathathu nje kuphela kwiChiefs kodwa abayingeni eyombango wesicoco.
Nayizolo umqeqeshi weBucs, uJosef Zinnbauer, uqhubeke kulelo vangeli.
Ebuzwa ukuthe ngabe amaphuzu amathathu kulokhu abaluleke kakhulu ngenxa yethuba asebenalo lokunqoba iligi, uthe: “Emasontweni ayisishiyagalombili edlule akekho obethi sinethuba lesicoco. Manje senithi ‘sinethuba lesicoco’. Cha sinethuba lamaphuzu amathathu. Ngingowokugcina ukuthi ngithi asisifuni isicoco. Bonke abadlali bayasifuna isicoco. Uma sinalo ithuba sizolithatha. Sinalo ithuba lokuthatha amaphuzu amathathu. Akusona isikhathi esikahle ukukhuluma ngesicoco.”
UMiddendorp uthe akungatshazwa ukuthi izindawo ahleli kuzona womabili amaqembu kulokhu zifana nesinye isinongo esenza umdlalo uhehe kakhulu kunakuqala.
“I-Kaizer Chiefs ayikaze ibe kule ndawo ekuyona eminyakeni emihlanu. Kithina kufana nento entsha. Mhlawumbe hhayi kwabanye abadlali asebeke badlala kowomkhaya iminyaka. Kodwa izindawo esikuzona, zenza lokhu kwehluke. Ngeke ngingene kulolu gibe (lokuthi iPirates ayikho embangweni). Ngiyezwa kuthiwa iKaizer Chiefs ifuna isicoco kodwa iPirates ayisifuni. Angikaze ngiwuzwe umbhedo ofana nalona kulezi zinsuku ezedlule,” kusho uMiddendorp.
Ukube bekungabashayi sibhakela akungatshazwa ukuthi uMiddendorp ngabe uwunqobile lo mzuliswano wabezindaba njengoba ubephumela obala ngezinhloso zabo zokunqoba isicoco ekupheleni kweligi ngesikhathi umkhaya wakhe waseGermany, ebuye wagcizelela ukwakhela isizini ezayo.
Nokho bobabili abaqeqeshi bavumelene ngokuthi balindele umdlalo onamagoli njengoba womabili amaqembu ephethe abadlali abahamba phambili ngamagoli. I-Pirates ezobe ingosokhaya igabe ngoGabadinho Mhango onamagoli awu-14 kwiligi. KuMakhosi kukhona uSamir Nurkovic osevalele awu11. Umzuliswano wokuqala weligi waphuma namagoli amahlanu kunqoba iChiefs ngo 3-2.