Bethula ubuchwepheshe kwaVW
ZIQINISEKISIWE izikhathi zokuza kwezimoto ezintsha zakwaVolkswagen kuleli kwaphinde kwadalulwa nezinhlelo zakulo nyaka.
I-VW iveze ukuthi izokwethula uhlelo olubizwa ngeVolkswagen We. Lobu buchwepheshe buhlanganisa izinto eziningi ezahlukene kanti amakhasimende kumela afake i-app yakwaVW kwiselula.
Uma unayo uyakwazi ukuthola ukuthi imoto ipake kuphi, ubone uphethroli mngakanani nokunye.
Kukhona nokubizwa ngeWe Experience yona eyenza ukuthi uma uvula i-app bese ikutshele izindawo ezishibhile eziseduze.
“Ukwenza isibonelo, uma ikhasimende lidinga ukufaka uphethroli, livula i-app kwiinfotainment system bese ucela igaraji eliseduze ikukhethele othola kulo iRed Bull yamahhala,” kusho uMartina Biene oyiHead: Volkswagen Brand.
Uthe kodwa bafuna ukuba nabantu abangu-150 000 abazobhalisa ukuze bezokwazi ukuthola izitolo abazobambisana nazo.
I-We Connect Go yona ehlanganisa ukubheka ngezinkambo ozithathile, ukubekisa isikhala sokusevisa imoto nokunye, izoqala ukutholakala kusuka maphakathi nonyaka kusuka kwiPolo Hatch Comfortline.
Lobu buchwepheshe akubona kuphela le nkampani ethe izobethula. Maphakathi nonyaka bazokwethula iT-Roc okuyiSUV eyakhelwe phezu kwesisekelo seGolf. Iza ngemuva kweT-Cross eyethulwe ngonyaka odlule yakhelwe phezu kwePolo. Bazobe bevula ama-oda bese iqala ukutholakala ngekota yesithathu yonyaka.
Umndeni weT-Cross uzokwandiswa ngenenjini engu.1.5TSI enamandla angu110kW nenye engu-1.0 enamandla angu-70kW.
Bazophinde bathule neGolf GTI TCR ezobhekana ngqo neHyundai i30 N esanda kwethulwa. Kuzolethwa kuphela angu-300 kuleli. Le Golf inamandla athe xaxa kuneGTI kodwa angaphansi kuneGolf R njengoba engu-213kW.
I-VW iphinde yaveza ukuthi izokwethula iPolo Vivo yekhethelo bese kuthi ngekota yokugcina kuze iGolf 8 GTI. Bazoletha neTiguan ethuthukisiwe.
Ngasohlangothini lwakwaVW Commercial kuzolethwa i-Amarok enamandla njengoba igubha iminyaka engu-10 yethulwa kuleli.
Le Amarok ezokwethulwa inenjini eyiV6 kodwa enamandla angu-190kW ne-torque engu580Nm. Kwi over-boost amandla afinyelela ku-200kW. Ukusuka ku-0 iye ku-100km bathi kuyithatha imizuzwana engaphansi kweyisishiyagalombili.
Kuza neTransporter 6.1 enamalambu amasha, ubhampa, igrille, amarimu amasha nokunye.