I-Ford Ranger izogijima ngentsha
LIZOGADLA ngemoto entsha iqembu leFord Castrol Cross Country Team emjahweni iSouth African Cross Country Series (SACCS) wakulo nyaka.
Leli qembu elilawulwa yiNeil Woolridge Motorsport (NWM) lizobe lihamba ngeFord Ranger entsha enenjini enama-turbo amabili.
Phambilini, belihamba ngeRanger enenjini yeFord Mustang engu-5.0 litre V8 engenayo i-turbo.
Eyakamuva ingu-3.5 litre V6 EcoBoost twin-turbocharged esetshenziswa kwiFord F-150 Ranger Raptor nakwiFord GT.
IRanger ebisetshenziswa isingenele imijaho kuleli naphesheya kusuka ngo-2013.
Kwakhiwe angu-24 esikhungweni seNWM eMgungundlovu.
UMengameli weNWM, uNeil Woolridge, uthe ngemuva kokunqoba esigabeni seClass T ngo-2018 nango-2019 sekuyisikhathi sokubhekana nenselelo entsha esigabeni seFIA-Class esikhule kakhulu saba ngesithandwa emncintiswaneni wakuleli naphesheya kwezilwandle.
IRanger yeNWM izoba ngeyokuqala ukungenela umjaho nenjini ene-turbo kaphethroli.
“Ukwethulwa kwezinjini zikaphethroli ezine-turbo yiFIA kusho isikhathi esimnandi emdlalweni futhi kusho lukhulu ukuthi iFord neNWM ibe soqhulwini lalokhu,” kusho uWoolridge.
Uthe bazobe beyithuthukisa unyaka wonke le moto bese bebanga isicoco ngonyaka ozayo.
UWoolridge uthe bazokwazi ukuyethula le moto emjahweni wesibili noma wesithathu wale sizini yeSACCS.
“Sihlele ukuthi sibe nezimoto ezintsha ezintathu maphakathi nonyaka, ngesikhathi esikahle seBotswana Desert Race ngoJuni.”
UGareth Woolridge uzobe evivinya iFIAclass Ranger entsha emjahweni ngesikhathi ezinye zisakhiwe. Uzobe ebambisene noBoyd Dreyer.
Umfowabo omdala, uLance, uzobe eshayela iRanger V8 ethuthukisiwe uma sekuqala isizini emjahweni iMpumalanga 400 eDullstroom namhlanje nakusasa.
Uzobe elekelelwa nguElvéne Vonk othatha izintambo kuWard Huxtable.
Abanye abashayeli ngoMarcos Baumgart noKleber Cincea baseBrazil.