Uzovela enkantolo unina wengane etholwe ifile
UZOVELA enkantolo namhlanje owesifazane (42) oboshwe emuva kokufa kwengane yakhe eMhlali, eThekwini.
Ingane (6) ibifunda eMhlali Preparatory.
Kuthiwa owesifazane ngeSonto wavula icala esiteshini saseMhlali ethi kuthunjwe ingane yakhe kade ehamba nayo ngemoto.
Okhulumela amaphoyisa KwaZulu-Natal, u-Brigadier Jay Naicker, uthe emuva kokuvulwa kwecala lokulahleka kwengane kwabe sekuba nophenyo oluholele ekuboshweni kukanina wengane.
“NgeSonto amaphoyisa aseMhlali athole umbiko ngokuthunjwa kwengane. Unina wengane ubike ukuthi wayehamba emgwaqweni u-Glendale eduze kwase-Shayamoya nezingane zakhe ezimbili. Uthe ngesikhathi esehamba kwizinciphisajubane kwaba khona owesilisa owavula isicabha semoto yakhe wabe esethatha ingane yakhe eyayilele,” kusho uNaicker.
Unina wengane uthe wasuka endaweni yobugebengu waqonda ngqo emaphoyiseni.
“Emuva kophenyo lwamaphoyisa kube sekuboshwa owesifazane (42). Isidumbu sengane sibe sesitholwa esimobeni e-Riet Valley. Unina ubekwe icala lokubulala. Uzovela enkantolo yaseMhlali kusasa (namhlanje),” kusho uNaicker.
Umthombo weSolezwe uthe kuseyindida ukuthi yini eholele ekuthini alimaze ingane kodwa kunezinsolo eziqinile zokuthi uyibulale ngephutha wabe eseyoyilahla maqede wayobika emaphoyiseni ukuthi ithathiwe.
“Konke obekukhulunywa unina wengane bekusolisa. Okusadida wukuthi ingane yakhe uyibulale kanjani nokuthi bekwenzekeni. Okusavela ukuthi yiphutha kodwa wafihla,” kusho umthombo.
Okushiwo wumthombo bekungakaqinisekiswa ngamaphoyisa ngoba kusazohlolwa isidumbu ukuthola ukuthi yini imbangela yokufa kwengane.
Umkhuzi wamaphoyisa KwaZulu-Natal uLieutenant General Khombinkosi Jula, uncome amaphoyisa ngokusheshe abophe kuleli cala wathi wonke amacala obugebengu athinta abesifazane nezingane athathelwa phezulu.
“Siphoxekile nokho ukuthi ingane ebidukile ayizange itholakale isaphila, sizokwenza konke okusemandleni ukuqinisekisa ukuthi umbulali uyajeza,” kusho uJula.