Uyaqina umthetho olawula izinkulisa
IPHINI likaNgqongqoshe wezokuThuthukiswa koMphakathi, uNkk Hendrietta Bogopane-Zulu, lidonse ngendlebe abazali ukuthi bathumele izingane zabo kuphela ezinkulisa ezibhaliswe ngokusemthethweni.
UNkk Bogopane-Zulu ubethula umkhankaso ozoqinisekisa ukuthi zonke izingane ezincane ziya ezinkulisa ngaphambi kokuya esikoleni obizwa ngeVangasali.
UVangasali yigama leXiTsonga elisho ukuthi bangasali.
“Siyazi ukuthi kunezinkulisa ezingabhalisiwe ngokusemthethweni eMnyangweni wezokuThuthukiswa koMphakathi. Lokhu kusho ukuthi ziyingozi ngoba kunemigomo engalandelwa. Siyacela abazali nabanikazi bezinkulisa baqinisekise ukuthi izingane zifunda ezinkulisa ezibhaliswe nathi ngokusemthethweni futhi ezinesitifiketi esishoyo ukuthi zibhaliswe njengenhlangano engayenzi inzuzo,” kusho uNkk Bogopane-Zulu.
Uthe abanikazi bezinkulisa kufanele bazozibhalisa izinkulisa zabo ngoba uma uMnyango wezokuThuthukiswa koMphakathi uma betholwa ukuthi kababhalisile ngokusemthethweni, kuzoshuba.
“Izinkulisa kufanele zibe nabasebenzi abavumelekile ukusebenza nezingane. Lokhu ngeke ukwazi uma ungumzali uma inkulisa ohambisa kuyo ingane yakho ingabhalisiwe ngokusemthethweni. Izinkulisa zibalulekile, yingakho sithula lo mkhankaso ohlose ukuthi zonke zibhaliswe ngokusemthethweni,” kusho uNkk Bogopane-Zulu.
UMnyango wezokuThuthukiswa koMphakathi usebenzisana neNelson Mandela Foundation, Unicef nezinye izinhlangano kulo mkhankaso weVangasali.
UNksz Limpho Monyamane obhekele ukusebenza kweNelson Mandela Foundation, uthe bazoqinisekisa ukuthi izinga lokufunda nokuthuthukiswa kwezingane ezinkulisa liyathuthuka.
Uthe kubalulekile ukuthi zibhaliswe ngokusemthethweni ukuze zilandele umthetho wokuvikelwa kwezingane.
Kuleli sonto iNingizimu Afrika igubha iSonto likaZwelonke lokuVikelwa kweNgane, ngendikimba ethi ‘Sonke Masivikele Izingane’.
UMnuz Andre Viviers we-Unicef, uthe zibalulekile izinkulisa ekuvikeleni izingane ngoba kulapho zihlala khona uma abazali beyosebenza noma besesikoleni.