Akuhlehliswe ukuphela konyaka wesikole
ISIDIDIDI esisuke ngeSonto kungasacaci ukuthi izikole zizovulwa yini ngoMsombuluko asamukelekile. UMnyango weMfundo eyisiSekelo ubulokhu ubambelele ekuthenini izikole zizovulwa ngoJuni 1 yize izinyunyana zothisha bezilokhu zishilo ukuthi inqwaba yezikole ayikulungele ukuvula.
Kwale ngisho sekuputshuka umbiko ophume kwelinye lamaphephandaba ngeSonto obusho ukuthi izikole ngeke zivulwe kodwa umnyango wathula, kunalokho wamemezela isithangami nabezindaba ngehora lesithupha ntambama esigcine sihlehliselwe uMsombuluko ngomzuzu wokugcina.
Ngesikhathi umnyango ubamba uyeka ilanga bese lishonile, abazali bedidekile bengazi ukuthi bazilungiselele noma bangazilungiseleli izingane zabo, kunezingane ezifunda kwamanye amadolobha, kunomalume abangazi noma bazovuka bathuthe izingane noma cha.
Ugcine umnyango umemezele ebusuku ukuthi ukuvulwa kwezikole kuhlehliselwe uJuni 8. Nalolo suku izinyunyana zothisha zishaya amakhala ngalo njengoba zithi luseduze kakhulu ekubeni ziziningi izikole ezingakulungele ukuvula nakhu kwezinye izifunda sekulahleke nezimpahla zokuzivikela ebeziyiswa ezikoleni.
Inselelo ebhekene nohulumeni ngalesi sikhathi sokuqubuka kweCovid-19 iyaziwa futhi izinqumo okumele zenziwe azilula njengoba kucatshangwa.
Kodwa yize kunjalo, akuxoleleki ukudidizela lokhu okwenzekile ngeSonto futhi akwamukelekile ngoba kukhombisa indelelo nokungabahloniphi abazali, othisha nabafundi uqobo.
Kwenziwa yini ukuthi umnyango uhlale uthi uyaxhumana nazo zonke izinhlaka ezithintekayo ukuqonda okwenzekayo ezikoleni kodwa ungakwazi ukusheshe uthathe izinqumo ekubeni izinyunyana zikwazi ukusheshe ziphumele obala zisho ukuthi izikole azikulungele ukuvula?
Yini lena umnyango obucabanga ukuthi isazokwenzeka ngeSonto ebingalungiselela zonke izikole ekubeni kuhlulekile amaviki amaningi? Namanje akucaci ukuthi yini engako ezoshintsha ngezinsuku eziyisikhombisa.
Mhlawumbe kunokujaha ukuvula, kumele umnyango uqale manje izingxoxo zokubheka ukuthi ngeke yini kwaba ngumqondo ophusile ukuhlehlisela ukuphela konyaka wesikole phakathi nonyaka ozayo bese uzinika isikhathi esanele sokulungiselela ukuvula kahle.