Asingakhohlisani, abamhlophe basasicwasa namanje
Thanda Chonco KWESAKWAMTHETHWA
MHLELI: Ake ngiveze owami umuzwa nombono ngodaba lokucwasana, ikakhulu ukucwasa kwabamhlophe becwasa abamnyama. Le nto yokucwasa ayisoze yaphela noma sesithanda kodwa iyoqhubeka ikhohlisane ihlomile, abanye bahleke inhlinini nabamhlophe.
Kungani ngithi: ikhohlisana ihlomile? Yingoba ngibona abamhlophe bezenza abantu abanothando noxolo kwabamnyama. Le mpi eqhutshwa abamhlophe yenzeka cishe umhlaba wonke ikakhulu kwezemidlalo nezokungcebeleka.
Indlela asebelwa ngayo abamhlophe, basebenzisa izinkundla zokuxhumana (ikakhulu kuleli). Konke lokhu bakwenza ukuze sizizonde thina qobo lwethu sizenyeze ngokuba ngabase-Afrika. Zolo lokhu sibone umlisa thizeni eqhuba yona “impi” yokudicilela phansi isithunzi somuntu omyama. Lowo mlisa omhlophe wadweba isthombe sikaDkt Nkosazana Dlamini Zuma saba nobuso bemfene.
Ngokwami lokhu ukuqondise kuwona wonke umuntu omnyama uthi ufana nemfene, hhayi kuDkt Dlamini Zuma kuphela. Kungajabulisa ukubona iSouth African Human Rights Commission (SAHRC) yenza umsebenzi wayo ingachemi.
Njengobani kodwa ongathanda ukufaniswa nemfene?
Kuyajabulisa ukuthi i-ANC ne-ANCWL balusukumele lolu daba bafaka isikhalo kwiSAHRC.
Asethembe ukuthi kukhona ozojeza ngalokhu. Nakwamanye amazwe basaqhubeka abamhlophe bacwasa abamnyama kangangokuthi kuze kufe abantu.
Bheka-nje e-USA amaphoyisa akhona asanda kubulala umuntu omnyama (uGeorge Floyd) ngesihluku esesabekayo. Abukho ubugebengu obungenza umuntu afanelwe ukubulawa kanjeyana. Abamhlophe kuleli abayingeni eyokubuyisana, ngoba abaxolile ngokuwela kwezwe kwabamnyama.
Cishe kwakungcono inkankane nenkankane lisadla umsundu wangakubo.
Sibahle Ngobese ENQUTHU