I-SABC1 izoqhakambisa umsebenzi wentsha
NJENGOBA uJuni uyinyanga yentsha yakuleli isiteshi sethelevishini iSABC1 sesiveze ukuthi sizogxila kakhulu ezinhlelweni, emidlalweni nakumafilimu aqhakambisa umsebenzi omuhle owenziwa yintsha yakuleli.
Lokhu kuqale ngeSonto njengoba kukhonjiswe ifilimu ethi Baby Mamas eyadonsa amehlo ngesikhathi ikhonjiswa emabhayisikobho ahlukene akuleli.
Kuthe ngoMsombuluko, kwaqala uhlelo olusha olufundisa ngomculo wehip-hop, iBlow Up or Cave in olwethulwa umrepha owaduma kudala uZabz.
Lolu hlelo lungena ngo-9.00 ebusuku.
UPhillip Mabitsela wakuSABC1 uthe olunye uhlelo lwentsha oseluqalile ukukhonjiswa esiteshini sabo oluthungatha amakhono entsha efuna ukungena emculweni i-One Mic.
Lolu hlelo olunejaji elisha lungena njalo ngoLwesine ngo-6.00, ntambama.
“Njengoba abantu behleli emakhaya nje esifuna ukuqinisa kakhulu kukhona siyisiteshi ukubalethela amafilimu akhiqizwe yintsha yakuleli futhi enza kahle ngesikhathi ethulwa kubantu emabhayisikobho. La mafilimu azokhonjiswa njalo ngeSonto ngo-7.30 ebusuku. Intokazi uStephina Zwane ibiqondisa ifilimu iBaby Mamas kuyona okulingisa abalingisi okubalwa kubo uSalamina Mosese, Thembisa Mdoda, Dineo Ranaka noKay Smith. Kuzothi ngoJuni 7 kudlale ifilimu ethi She Is King eqondiswe uGersh Kgamedi, kuyona kulingisa abalingisi bakuleli okukhona kubo uGugu Zulu, Aubrey Poo, Khabonina Qubeka, Khanyi Mbau noSophie Ndaba. NgoJuni 14 sizokhombisa ifilimu ethi Happiness Is A Four Letter Word kuyona kukhona izintokazi okubalwa kuzo uMmabatho Montsho, Renate Stuurman, Khanyi Mbau, Chris Attoh noTongayi Chirisa ,” kuchaza uPhillip.
Uthe ngeke nje kube yila mafilimu kuphela kodwa akhona namanye okubalwa kuwo ethi Safe Bet 1 namanye.
NgoLwesithathu uthe, bazoqhubeka bethulele abantu amafilimu enziwe yintsha ebisebenzisana nesikhungo iNFVF Youth Films, angena njalo ngo-7.30 ebusuku.
Kwamasha azokhonjiswa kule nyanga uthe kukhona ethi, The Turning Son, Feminine Lotus, Samson nethi Light Bulb Moment.
Uveze ukuthi okunye ababukeli abangakulindela yizinhlelo zomculo okukhona kuzo oluthi Dankie San: Prokid Special nalapho kuzobe kukhunjulwa umculi wehip-hop osadlula emhlabeni uProkid, noluzokhonjiswa ngoJuni 18, ngo-9.00 ebusuku.
UPhillip uthe kuningi abazokumemezela ngokuhamba kwesikhathi okuzobonakala kuSABC1.