Utokile osolwa ngokufa kwendodakazi
UZOGQUNYWA esitokisini kuze kube uJuni 10 unina wengane eneminyaka eyesithupha osolwa ngokuyibulala. UNkk Fungai Nyamadzawo (42), uvele izolo enkantolo yaseMhlali ngamacala amane okubalwa kuwo elokubulala indodakazi yakhe eneminyaka eyisithupha u-Alexia Nyamadzawo, elokuphazamisa ukusebenza komthetho, elokuqamba amanga nelokuthumba.
Okhulumela amaphoyisa KwaZuluNatal uBrigadier Jay Naicker, uthe kulindeleke ukuba acele ibheyili uma ebuyela enkantolo.
“Owesifazane oneminyaka engu-42 uvele enkantolo yaseMhlali namhlanje (izolo), ubhekene namacala amane. Icala lihlehliselwe uJuni 10 nonyaka ukuze acele ibheyili. Usagciwe esitokisini,” kusho uNaicker.
Owesifazane ngeSonto waya esiteshini samaphoyisa eMhlali wabika ukuthi kukhona ontshontshe ingane yakhe kade ehamba ngemoto.
Wathi uvule isicabha wathatha ingane yakhe ilele.
Emuva kophenyo lwamaphoyisa isidumbu sengane satholwa esimobeni silahliwe. Unina waphonswa imibuzo wabe eseboshwa ngecala lokubulala.
Isolezwe lithole ukuthi umsolwa wayebhukuda nengane yakhe ebhishi ngesikhathi iminza. Wasaba ukubika njengoba kunemithetho kathaqa wabe eseyolahla isidumbu.
Sengathi naye wayehlele ukuzibulala kodwa wasaba, wabe eseba necebo lokuthi ingane intshontshiwe.
Lokhu bekungakaqinisekiswa amaphoyisa ngoba uphenyo lusaqhubeka.
Kwelinye icala kuboshwe oneminyaka engu-23 ngecala lokubulala abayisikhombisa e-Adams Mission.
Umsolwa uMnuz Sibusiso Sandile Langa (23), izolo uvele enkantolo yaseMbumbulu ngamacala ayisikhombisa okubulala. Icala lihlehlele uJuni 11 nonyaka.
Isigameko sokubulawa kwabantu senzeka ngoMeyi 20 nonyaka eMsahweni.
Kwafa abesilisa abaneminyaka ephakathi kuka-21 no-36. Amaphoyisa akwaMakhutha abophe umsolwa ngeSonto.
Umkhuzi wamaphoyisa KwaZuluNatal uLieutenant General Khombinkosi Jula, uncome abaphenyi ngokubopha umsolwa wathi uyathemba ukuthi uzojeza ngamacala akhe.