Udla ngakhezo lunye namaphoyisa osolwa ngokubulala
UWUMNGANI omkhulu wamaphoyisa asoThongathi umnikazi wendawo yokuzijabulisa yaseHambanathi, osolwa ngokubulala nokuthumba umfundi owaduka ngemuva kokuba eshaywe kule ndawo ngoba esolwa ngokweba utshwala ngenyanga edlule.
UMnuz Mlungisi Thabethe (28) ongumnikazi weMagagula Lounge, ongomunye wabasolwa abayisithupha abafake isicelo sokudedelwa ngebheyili yiNkantolo yeMantshi eVerulam, kuvele ukuthi unobudlelwane namaphoyisa asoThongathi, amanye uwabiza ngamagama angabizwa ngawo kulesi siteshi.
UThabethe ongummangalelwa wokuqala kuleli cala nobegibele ebhokisini lofakazi izolo, uphikile ukuthi uwumngani namaphoyisa akulesi siteshi wathi uke axhumane nawo uma enezinkinga ngokomsebenzi kodwa akubona abangani bakhe.
UMshushisi uMnuz Kristen Shah obebapheka ngemibuzo uthe ngesikhathi ummangalelwa ekhuluma kuyo le nkantolo ngoLwesibili ubebiza iphoyisa elalingumphenyi wecala ngoGodicks, ekubeni esiteshini samaphoyisa leli phoyisa libizwa ngoWarrant S Moodley, ebiza umphathi wabaseshi ngoFatima ekubeni esiteshini waziwa ngoLt Col Perumal.
UThabethe ukuphikile wathi naye umseshi umazi ngegama likaMoodley, ngesikhathi umshushisi emcindezela ngemibuzo uthe umbiza ngoGodicks ngoba nasesiteshini ubizwa kanjalo. Ngosuku okwalahleka ngalo uBobo uthe wafonela uCol Msomi inhloko yeVisible Policing nephini lomphathi siteshi ngoba efuna kuboshwe umufi kodwa wabuye wangalivula icala ngoba bawumndeni.
Ebuzwa ukuthi kungani afonela uMsomi uthe babejwayelene. Uma esebuzwa ukuthi uyazi yini ukuthi uMsomi wazibulala ngemuva kokuthi eboshiwe, uthe akanalo ulwazi.
“Ngesikhathi ufonela uMsomi umufi wawusamgcinile eMagagula, usafuna ukuthi ubathole bonke abathintekayo ekwebiweni kwamakesi otshwala angu27. Enkulumeni yakho akukho lapho uthi wabikela ugogo noma unina ngoba niwumndeni. Isizathu sokuthi ungayi yingoba wayeseshonile. Uzama ukuzivikela njengoba uthi awumbophanga ngoba eyilunga lomndeni ,” kuvutha uShah.
Ephendula uThabethe uthe: “Ngabona ukuthi uma eboshwa njengoba sihlobene kuzodingeka ukuthi ngibuye ngilandelele. Ngamshaya ngempama ngamtshela ukuthi angaphinde abuye la.”
Leli cala like laguqa isikhashana uThabethe nobasolwa abahlanu bethi abakutholanga ukudla ejele eWestville, lapho begcinwe khona. Kudingeke ukuthi umshushisi ukuthi afone abuze, kwathiwa zonke iziboshwa ziyadla ngaphambi kokuthi ziye ezinkantolo.
Icala liyaqhubeka namhlanje.