Kusebenze uR1.3 billion eKZN empini yeCorona
UNGQOGQOSHE wezeziMali KwaZulu-Natal uMnuz Ravi Pillay uthe isifundazwe sesisebenzise uR1.3 billion, sizama ukubhekana neCorona.
Ethula isabelo-mali somnyango wakhe sika-R718 million, esiShayamthetho saKwaZulu-Natal izolo, uPillay uthe bazokuqapha ngelokhozi ukusetshenziswa kwemali yiminyango kahulumeni njengoba kuliwa negciwane.
‘’Sizophinde sithathe nezinyathelo ezinqala ekulweni nenkohlakalo nokukhwabanisa kuhulumeni ukuqinisekisa ukuthi yonke into ihlala obala nokuthi ukukhishwa kwemisebenzi kuhamba ngendlela,” kusho uPillay.
Uthe bazophinde babuyekeze yonke imisebenzi ekhishwe yiminyango kahulumeni njengoba kuliwa neCorona.
“Lokhu sizokwenza ukuze senze isiqiniseko sokuthi yonke imali isebenze ngendlela,” kusho uPillay.
Uthe bazophinde baseke imikhandlu namabhizinisi kahulumeni ukuqinisekisa ukuthi imali isebenza ngendlela.
“Sizo-phinde sisize iminyango kahulumeni, amabhizinisi kahulumeni nomasipala ekuqhubeni izinhlelo zentuthuko ezimile, inhloso yethu ukwakha ubudlelwano obuhle kuzona zonke izinhlaka zikahulumeni,” kusho uPillay, wengeza ngokuthi lobu budlelwano kumele bakhelwe ekuthembaneni.
“Omunye umsebenzi osihlalele ukusiza uphiko olukhipha amathenda ukuba luwenze kahle umsebenzi walo ngalesi sikhathi seCorona,” kusho uPillay. Uthe lukhona uphenyo olwenziwe noseluphothuliwe mayelana namacala athinta inkohlakalo nokukhwabanisa. UPillay uthe amanye amacala adluliselwe emaphoyiseni, wengeza ngokuthi kunemali engaphezu kukaR500 million, ebiyebiwe esilandwe wuphiko olushaqa impahla.
Iminyango kahulumeni iyisebenzise kanje imali enayo njengoba kuliwa neCorona.
OwezoLimo R 5.859,010 million
OwamaSiko nobuCiko R 383.353 million
Ukuphepha koMphakathi nokuXhumana R 262,500m
OwezokuBusa ngokuBambisana neziNdaba zoMdabu R198.516m EwezokuThuthukiswa koMnotho R 5.676,741million
OwezeMfundo R 35.029,806 million
OwezeMpilo R1.285,719 million
OwezokuHlaliswa kwaBantu R 1.765 million
Ihhovisi likaNdunankulu R735 421 million
Umnyango kaMgcinimafa R83.209 million
OwemiSenzi yoMphakathi R 144.900 million
OwezokuThuthukiswa koMphakathi R51.642 million
OwezemiDlalo R 126.197
OwezokuThutha R1.873 million