Izigebengu zishaye zachitha nodekle
BASALE bencela izithupha abebeyohola isibonelelo sikahulumeni esitolo eScottsville, eMgungundlovu, kugasela abantu abebegqoke sengathi bahlola ukuhlanzeka kwezitolo bashaqa imali maqede baphela endaweni.
Kuthiwa ingaphezu kukaR200 000 imali izigebengu ezishaye zachitha nayo.
Izigebengu zitheleke kuvele sekunabantu abebemi olayini belinde ukuhola isibonelelo sikahulumeni.
Abebezohola kuphoqekele kuthi bajikiswe ngoba imali ibisithathwe yonke.
Okhulumela amaphoyisa KwaZulu-Natal, uCaptain Nqobile Gwala, ukuqinisekisile okwenzekile wathi amaphoyisa ayaphenya.
“Ekuseni namhlanje (izolo), ngabo-8.15 kufike amadoda amane abegqoke sengathi azobulala amagciwane esitolo. Angene endaweni yebhizinisi eScottsville, aya ehhovisi okuhlala kulo imali acela imenenja. Amadoda amabili angene ehhovisi lemenenja amanye amabili asala emi ngaphandle. Abakhombe ngezibhamu babaphoqa ukuba balale phansi. Abe esebekhipha yonke imali esisefeni. Aphume base bebaleka ngemoto ebibalinde ngaphandle. Amaphoyisa asesiteshini ku-Alexandra Road, avule icala lokubamba inkunzi. Uphenyo lusaqhubeka,” kusho uCaptain Gwala.
Umthombo weSolezwe uthe kube lula ukuba izigebengu zingene ziphume esitolo ngoba bezigqoke izimpahla ebezizenza zibukeke sengathi zizosebenza.
Uthe ngisho nabantu abebemi ngaphandle bamangale sekuthiwa isitolo siyavalwa, kwabe sekufika amaphoyisa ngokushesha.
Abebezohola kuthiwa bacelwe ukuthi bayozama ukuhola kwenye indawo ngesikhathi amaphoyisa esasebenza endaweni yobugebengu.