Bakhale ngolayini abantu abadala
BEBEKHALA ngokucotha kolayini abantu abadala baKwaMashu abavuke kusachinsa umthini ukuze babe ngabokuqala kulayini wempesheni.
Ithimba leSolezwe lihambele KwaMashu esiteshini lapho abantu abadala bebemi kulayini omude wokuyohola eposini, kwaSpar nasemabhange.
Izalukazi ebeziyohola eposini zikhale ngolayini obuhamba kancane.
UNkk Julia Ngubo ongayazi iminyaka yakhe noNkk Funani Gcwensa (65) akade bemi kulayini ndawonye bathe bafike esiteshini kusemnyama baphoxeka uma kushaya o-10 besami kulayini.
“Sifike ekuseni kakhulu ngoba sifuna ukuba ngabokuqala kulayini sawufica usuvele umude. Okuxakayo wukuthi awusheshi kulokhu. Siyacela ngokuzayo bazame ukushesha, singami isikhathi eside kolayini ngoba sinoshukela,” kusho uNkk Ngubo.
UNkk Gcwensa uthe bayathanda ukuhola eposini ngoba imali yabo bayithola njengoba injalo ngisho belahle amakhadi.
UNkk Goodness Sikhakhane (80) uthe uvuka ekuseni ayohola eposini ngoba walahlekelwa yikhadi lakhe ngaphambi kokuvalwa kwezwe.
“Ezinye izindawo azikwazi ukungisiza ngoba anginalo ikhadi lokuhola. Eposini bayakwazi ukungiholela impesheni yami ngoba ngifaka isithupha. Ikhadi ngizolenza ngesonto elizayo. Sengathi sebezosivumela ukuthi siwenze,” kusho uNkk Sikhakhane.
KwaSpar abantu abadala bebehlaliswe etendeni elinezihlalo benikwa nenkomishi yetiye ngesikhathi besalinde ukuhola.
Izolo nanamhlanje bekuhola abantu abadala nabakhubazekile.
Kusasa kuzoholwa ezinye izibonelelo.
Kulayini waseposini KwaMashu abebehleli ezihlalweni ngaphakathi akade bengacinene kodwa abanye akade bekulayini ngaphandle bebecinene bengawulandeli umthetho wokuqhelelana.
AbakwaSassa bathe abahola isibonelelo sezingane bazongenelwa wuR500 ngaphezu kwemali yabo yezingane kusukela manje kuze kube wu-Okthoba. Ezinye izibonelelo zinyuswe ngoR250 kusukela ngoMeyi kuze kube wu-Okthoba.