Baphawula ngesinqumo senkantolo
KUHLUKENE imibono kubameli mayelana nesinqumo senkantolo esithi imigomo ebekwe nguhulumeni mayelana nokuvalwa kwezwe esigabeni sesine nesesithathu, ayikho emthethweni.
INkantolo eNkulu yasePitoli inqume ukuthi eminye yemigomo ebekiwe iphula amalungelo abantu, yakhipha umyalelo othi kumele iguqulwe zingakapheli izinsuku ezingu-14, ikhiphe isinqumo ngoLwesibili.
Engxoxwenni ne-eNCA ochwepheshe babameli babeke imibono ehlukene izolo.
Ugalagala lommeli ezindabeni ezithinta uMthethosisekelo u-Adv Lawson Naidoo uthe usadidekile ukuthi ijaji lifinyelele kanjani kulesi sinqumo.
“Miningi imibuzo mayelana nokuthi ijaji lifike kanjani kulesi sinqumo, omunye angabuza ukuthi ngabe liyicubungule nini yonke imigomo ebekiwe kulezi zigaba okukhulunywa ngazo,” kusho uNaidoo.
Uthe ubona uhulumeni ezosiphonsela inselelo lesi sinqumo.
U-Adv Nthabiseng Dubazana weDubazana Attorneys usitusile isinqumo wathi sincike kakhulu ekubhekeleni amalungelo
abantu.
Uthe akucacile ukuthi yiziphi izinyathelo ezingathathelwa uhulumeni kwimibandela uma ehluleka yena ukuyilandela.
U-Adv Justin Ramages weTGR Attorneys uthe eminye imigomo inkantolo ethi ayikho emthethweni, ingaguqulwa uma uhulumeni enikeza imininingwane.
U-Adv Michael Osborne uthe incwadi efungelwe eyethulwe enkantolo yenziwe sekuxhanyazelwa.
“Ngibona kusazoba khona umdonsiswano wezomthetho kulolu daba,” kusho u-Osborne.
USolwazi Pierre de Vos uthe akhona amaphuzu amahle aphume esinqumeni senkantolo.
Uthe kodwa ijaji licishe lageja uma lithi yonke imigomo ebekiwe ayikho emthethweni.
U-Adv Norma Daves uthe nakuba imigomo ebekiwe inomqondo kodwa ngakolunye uhlangothi, icindezela amalungelo abantu.
Khona izolo ososayensi abaningi bathe ukuvalwa kwezwe eNingizimu Afrika akuzange kube nomthelela omuhle, banxusa uMengameli ukuba avele alivule izwe.