Baboleka komashonisa ngenxa yendlala
ABANTU bakuleli babhekene nenkinga yemali nokwenza abanye bagcine belala bengadlile noma baphoqeleke ukuya komashonisa ukuze bathole usizo.
Lokhu kuvezwe ucwaningo lwenkampani i-Ask Africa. Le nkampani ibilokhu ilandelela abantu bakuleli nendlela ababhekana ngayo negciwane iCorona kusukela kwamenyezelwa uthaqa kuleli ngoMashi.
Umphumela wombiko uveza isithombe esingesihle ngasohlangothini lwezimali nokuba nokudla kwabantu kuleli. Ucwaningo luveze ukuthi bangu-36% abangenayo nhlobo indlela yokwenza imali, bese beba u-40% abenza imizamo yokuba bakhokhe sekudlule isikhathi. Abanye kuvele ukuthi bavala izinto ezinjengomshwalense ukuze babenemandlana abazosala nayo.
Ohlangothini lokudla, kuthiwa abantu behlisa isibalo sokudla abanye bacela abangani nezihlobo ukuba babalekelele. Kokunye baya komashonisa. Kuvele nokuthi abangu-89% basenkingeni enkulu yezimali.
“Abangu-70% batsheleka kubangani, izihlobo nomashonisa ukuze bathole ukudla. Bese kuthi u-58% wabantu abangasebenzi baboleka kubangani nezihlobo nomashonisa,” kusho umbiko.
Oyedwa kwababili, wehlise isikalo sokudla abakudlayo ngenxa yokungabi nemali eyanele yokuthenga okunye.
Abantu besilisa kuthiwa yibona abasengcupheni yokulala bengadlile.
Abanye abantu kuthiwa baqhamuke nezindlela zokonga imali ngokubasa umlilo bapheke phansi ukuze bonge ugesi. Abanye basebenzisa izingadi zabo ukuba nokudla kunokuba bayothenga ezitolo.
“Izingane nabantu abadala abahlala emalokishini nasemjondolo yibona abasengcupheni yokulala bengadlile ngoba akukho ukudla okwanele, uma kuqhathaniswa nalabo abahlala emadolobheni nakomasipala abakhulu,” kusho umbiko.