Bahlelela ukubuya kwezitshudeni
IMANGOSUTHU University of Technology (MUT) ithi ikulungele ukwamukela izitshudeni nabasebenzi ngoJuni 17 uma isivula.
UMnuz Bheki Hlophe obhekelele ezokuxhumana eMUT, uthe bamatasatasa namalungiselelo okuqinisekisa ukuthi uma sebevula ngoJuni 17 konke kuhamba kahle, kusukela kwezenhlanzeko kuya kwezokufunda.
Uqhube wathi bebengakaziniki izitshudeni izinsiza zokufunda kwi-internet kodwa bebesematasa nohlelo lokuqoqa nokuqinisekisa imininingwane yezitshudeni ukuze uma kufika izinsiza, ziye kubantu abafanele.
UNksz Buhle Zwane obhekelele ezokuxhumana Elangeni College, uthe bakulungele ukwamukela u-33.3% wezitshudeni okufanele zibe sezikhungweni zabo.
“Izitshudeni zethu Elangeni College zisebenzisa izindlela ezihlukene zokufunda kulesi sikhathi okubalwa ama-website angayidingi idata, sinezinkundla zokucobelelana ngolwazi kwiWhatsapp, sisebenzisa amavoicenote nezinye izindlela zokuqhuba ukufunda. Sinohlelo lwethu olubizwa ngeColtech Moodle nayo enezifundo ezihlukene ezitholakala noma ungenayo idata. Sisanda kwenza nocwaningo oluzositshela ukuthi yiziphi ezinye izindlela zokufunda izitshudeni zethu ezizidindayo kulesi sikhathi,” kuchaza uNksz Zwane.
Uthe bazihlanzile izindawo zabo zokufundela balwenza nohlelo lokuqinisekisa ukuthi izitshudeni azicinani uma sezibuyile. Mayelana nohlelo lokuthwesa izitshudeni iziqu uthe basaxoxisana nomkhandlu, uma sebeqedile bazokwenza isimemezelo.
I-Nyuvesi yaseZululand neyaKwaZulu-Natal bathunyelelwe imibuzo ngokuthi ngabe bakulungele ukwamukela izitshudeni, bathi akukho abangakusho okwamanje.
UMnuz Alan Khan onguMqondisi wezokuXhumana eDurban University of Technology (DUT) uthe bakulungele ukwamukela izitshudeni ezidingekayo esikhungweni sabo emasontweni amabili ezayo futhi bamatasa nohlelo lokukhuculula nokuhlanza kahle isikhungo sabo.
Uthe uhlelo lwabo lokufunda ngesikhathi sikathaqa luyaqhubeka ngoba izitshudeni ziyasizwa ngedata emuva kokuthi lesi sikhungo sixoxisane nezinkampani eziyidayisayo.
Ubuye waveza ukuthi nohulumeni uhlela ukulekelela izitshudeni ezixhaswe yiNational Student Financial Aid Scheme (NSFAS) ngedata.
“IDUT ibinesabelomali esibhekelele iCovid-19. Sizakhele nezibulali magciwane ethu akhiqizwa wuphiko lwe-Applied Sciences. Izifonyo zikhiqizwe wuphiko lwethu lwe-Arts and Design. Sibuye sathola umnikelo wezifonyo eziwu-5 000 kwiDUT Confucius Institute nakwiFujian Agriculture and Forestry University eseFuzhou, eChina. Ozakwethu abasophikweni lweAccounting and Informatics basebenzise imishini yabo ye3D printing ngokubambisana neLuban Workshop benza okokuvikela ubuso (face shields),” kuchaza uKhan.
Uthe uhulumeni unohlelo lokutholela abafundi abaxhaswe wuNSFAS izinsiza kufunda. Abase-Unisa bathe izitshudeni ziqhuba kahle ngoba sezithumele umsebenzi wesikole owu-2.5 million kulesi sikhathi sikathaqa.
Bathe izifundo zabo eziningi zitholakala kuma-website angayidingi idata.
Mayelana nokubuyela kwezitshudeni esikoleni bathe zizovunyelwa uma sekukhulunywe nobuholi babo.
Baveze nokuthi sebesebenzise uR59.72 million kulezi zinyanga ezimbili, banika abafundi babo abawu-390 000 u-24 million gigabytes wedata.
Izitshudeni zizothweswa iziqu ngoDisemba ngokohlelo oluvirtual.