‘Asinikeli ngoba sinemali kodwa ...... ngenxa yothando’
IZOBA nokudla kwenyanga yonke imindeni ewu-106 eyamukele igilosa enikelwe wososeshini abawu-10, abangaphansi kweGreater North Taxi Association.
Izolo iGreater North Taxi Association idlulisele lo mnikelo kule mindeni emcimbini obusePrincess Magogo Stadium, KwaMashu. Imindeni ibingaphelele ngenxa yemithetho yeCovid-19 engavumeli ukuthi kuhlangane abantu abangaphezu kuka-50.
UNkk Samkelisiwe Xaba omunye owamukele igilosa uthe bayabonga kakhulu kosomatekisi ngoba izingane zidonsa omama ngezidwaba, uma sezilambile.
“Siyabonga ukuthi iGreater North isithengele igilosa ngoba sishayekile kulesi sikhathi seCovid-19. Eminye imindeni ibingazi ngempela ukuthi izolala idleni, njengamanje ukudla esikutholile kuzosilonda inyanga yonke,” kusho uNkk Xaba.
UMnuz Mjabulelwa Gcwensa oyilungu leGreater North, uthe banohlelo lokuthengela abafundi umfaniswano wesikole abalwenza minyaka yonke kodwa kulokhu banqume ukuthenga igilosa ezosiza imindeni yalaba bafundi ngenxa yeCovid-19.
“Asinikeli ngoba sinemali kodwa sinikela ngenxa yothando lomphakathi esiwuthuthayo. ICovid-19 isishayile, ibhizinisi lethu liyawa ngoba silayisha u-70% wabagibeli amatekisi akufanele agcwale. Sithe noma isimo sinzima sakhumbula ukuthi akufanele sikhohlwe wumphakathi,” kusho uGcwensa.
UMnuz Sifiso Mthethwa onguSihlalo Greater North nobuye abe yiPhini likaSihlalo weSantaco KwaZulu-Natal uthe imindeni enikelelwe iqokwe wososeshini abawu-10 ngoba bayayazi ukuthi iswele.
“Uma siqhubeka ngaphansi kwalesi simo kukhona abangeke babuyele emsebenzini. Ezinye izinkampani ziyavalwa. Kungakuhle sibambisane sikwazi ukuza namasu okuqhubekela phambili. Okwamanje alukho uxhaso uhulumeni asinika lona yize uNgqongqoshe wezokuThutha uMnuz Fikile Mbalula ethi usaxoxisana naboMnyango weziMali,” kusho uMthethwa.
Uthe banikele ngegilosa hhayi iphasela ngoba bafuna imindeni idle isuthe.
Igilosa yabo ibinesaka lerayisi, elempuphu, elikaflawa, ubhontshisi, amafutha, ushukela netiye.
Namhlanje uthe usoseshini waseNanda nawo uzokwenza okufanayo, unikelele emindenini ewu-120 empofu.
Uphethe ngokudonsa ngendlebe abagibeli ukuthi balandele imithetho yeCovid-19 ukuze bahlale bephephile wathi abashayeli ngeke babalayishe