Uzokhipha unyawo kowokupheka
SIZOPHEKA kwithelevishini isitshudeni saKwaZuluNatal, esinyelwe inyoni esandleni ngokukhethwa ukumela isifundazweni emncintiswaneni wokupheka.
UDasie Saneliso Kunene ofundela iHospitality and Catering eBerea College eThekwini, ubezizamela inhlanhla kulo mncintiswano obizwa ngeMunches & Thoughts.
Uthe wacelwa umzala wakhe ukuthi awungenele ngoba ebona ikhono lakhe lokupheka.
Umncintiswano akhethwe kuwo usungulwe ngumpheki odume ngelikaChef Phatanani kanti bekumele uqoshwe maduze kwithelevishini ukube akuphazamisanga iCovid-19.
“Bengivele ngikukhonzile ukupheka, okwenze ngathatha nesinqumo sokuyothuthukisa ulwazi lwami esikoleni.
“Umzala wami wangikhombisa isikhangiso somncintiswano wangincenga ukuthi ngingenele. Bekumele uthumele isithombe sokudla okuphekile uma ungenela. Ngakhetha ukupheka ipapa nesibindi,” kusho yena.
Uthe umncintiswano wawungenela ngoMashi, wathola umyalezo ngesonto eledlule ukuthi ukhethwe ukuncintisana nabanye ababili.
UDasie uthe nguye yedwa okhethwe ukumela isifundazwe kwabazopheka bukhoma ohlelweni lwethevishini. Uveze ukuthi okunye okumenze wabuyela esikoleni ukuyofundela ukupheka, wukuthi bese ephelelwa yithemba lokuthola umsebenzi wobunjiniyela.
Uneziqu zeMechanical Engineering azithola eMangosuthu University of Technology neB-Tech, ayithole eWalter Sisulu University. UNksz Kunene uthe udadewabo ayiwele naye ubengayizwa kahle eyokufundela ukupheka.
“Iwele lami lifuna ukungibona ngiphethe izipanela njengoba ngifundele ukuba ngunjiniyela, aliyizwa eyokupheka. Sengibone ukuthi ngizozibambezela ngilinde umsebenzi wobunjiniyela kanti ngibizelwe ekuphekeni,” kusho yena ehleka.
Yize ethe akavumelekile ukudalula okuningi ngomncintiswano, abagqugquzeli bawo bazokhipha imininingwane uma sewuzoqala kwithelevishini.
Ujabulela ukuthi uhlelo luzomenza aziwe yizwe lonke njengompheki aphinde afunde namanye amathiphu okupheka kwazobe encintisana nabo.
Uthe ngeke aphatheke kabi uma enganqobanga emncintiswaneni kodwa okubalulekile ukuthi uzofunda kuwona.
UDasie waseNewcastle, uthe uyazifela ngokupheka ukudla kwesintu. Ubejwayele ukucelwa ukuba aphekele imicimbi emincane ekhaya nakubangani.
Usebhalise nenkampani yokupheka ngethemba lokuthi emuva kokufunda uzokwazi ukungena ebhizinisini ngokugcwele.
Uke wabamba itoho njengonjiniyela kwaHullet Sugar. Ngokwabahleli bomncintiswano kuthiwa abakhethiwe ukuncintisana bazokhokhelwa izindleko zokuyoqopha uhlelo ePitoli.