Basukumele phezulu kuxegiswa umthetho
ABESIFAZANE abasebhizinisini lokudla bazithuntuthe beshesha izitsha zabo ebesizilele uthuli emuva kwesimemezelo sokuxegisa umthetho womvalelandlini.
Kubuye inhlasi yethemba ngesikhathi uMengameli Cyril Ramaphosa ememezela ukuthi abamabhizinisi okudla sebengawathumelela ukudla amakhasimende.
UNksz Fikile Xaba ongumpheki nomnikazi wendawo yokudla iMafifi Leaflet Restaurant & Bara eJozini, uthe ikati bese lilele eziko. Ushayeke kabili ngesikhathi kuqala imithetho yomvalelandlini ngoba indawo yakhe idayisa notshwala.
Yize eseqalile ukuhambisela amakhasimende afaka ama-oda kodwa isenkulu inselelo.
“Akulula ukuhambisela abantu ukudla emakhaya, kungcono labo abasemadolobheni.
“Ngisendaweni enezinga eliphezulu lokwebiwa kwezimoto, okwenza ngisabe ukuhambisa ukudla.
“Ngenxa yokuthi yisemakhaya abanye abantu abasebenzi intengo yokudla iphansi. Lokho kuchaza ukuthi kudla iphakethe ukuhambisela amakhasimende,” kusho uNksz Xaba.
Uthe uzoqhubeka nebhizinisi noma kunzima ukwenzela ukuthi amakhasimende angamkhohlwa.
UNksz Thabi Kweyama weThabi’s House Cakes, Events & Catering eHammarsdale, uthe ubesephuthwe yinqwaba yama-oda kwabafuna amakhekhe emicimbi yokuzalwa.
“Kube nzima ngoba ngesikhathi kumenyezelwa imigomo kathaqa bengingenazo izithako ezenele endlini.
“Kuthe noma sekuxegiswa imithetho, ezinye izitolo bezingenazo izithako esizisebenzisa uma sibhaka. Nokho sengiqalile ukupheka nokubhaka, ngihambisele amakhasimende.
“Inselelo enkulu wukuthi kuyizindleko ukuthutha ukudla. Kumele ucabange ezinye izindlela ukuze ungashayeki ephaketheni,” kusho uNksz Kweyama.
Uthe usenqume ukupheka okuyisikali esikhulu ukuze noma ethola ikhasimende angalimali kakhulu ephaketheni.
UNksz Kweyama ubuye aphekele imicimbi nemishado, okwenze walimala kakhulu ngoba nayo imisiwe.
Uthe amanye amakhasimende abesekhokhile idiphozi, kwadingeka awabuyisele imali.
UNksz Nokwazi Cele weGee Gee’s Cakes eThekwini, uthe uthole amakhasimende amaningana ngempelasonto yeMother’s Day.
Ubesefile amakhasimende emkhalela efisa amakhekhe akhe kodwa evalelwe wumthetho.
Njengoba sebevunyelwe ukuhambisa ukudla, usenamakhasimende azokwenza emakhaya imicimbi yokuzalwa neyokugubha usuku lomshado.
“Kunzima kuleli bhizinisi kodwa ngixwayisa abanye ozakwethu ukuthi bazame ukungalahlekelwa amakhasimende ngenxa yalesi sikhathi esinzima.
“Kumele bazame ukusebenza ngalokhu abanakho, ngeke kufane nokungenzi lutho,” kusho uNksz Cele.