Iyohlala iseqhulwini inhlalakahle yabahlwempu
KUYIQINISO elingephikwe ukuthi izwe lakithi libhekene nenkinga yokwentuleka kwemali nokubhebhethekiswe wubhubhabhane lwegciwane, iCorona.
Yize bekunezimo ezibucayi, sihlabeke umxhwele ngomsebenzi esesiwenzile ukwakha izinhlaka zokuthi abantu bakithi bangabi yizisulu zesifo iCovid-19.
Phela umasipala wethu, uyikhaya labantu abaningi abampofu, ngakho kubalulekile ukuthi ngaso sonke isikhathi ukuhlupheka kwabo, kungabi ithikithi lokuya kwelamathongo, njengoba lesifo singazibekile phansi. Sinenhlanhla ngobuholi obuqotho obukhonjiswa nguNdunankulu wesifundazwe uKhuzeni Zikalala, ngokunjalo noNgqongqoshe wezeMpilo KwaZulu-Natal, uNkk Nomagugu SimelaneZulu, njengoba sibhekene nalesimo. Siyethemba ukuthi lezivunguvungu zizodlula nesimo sigcine sibuyele kwesijwayelekile, inqobo nje uma sonke siqhubeka sisebenza ngokubambisana.
Selokhu uMengameli (Cyril Ramaphosa) amamezela ukuvalwa kwezwe, njengabo bonke omasipala ezweni, iTheku nalo lishayeke kakhulu kwezezimali. Yehle ngezinga elimangalisayo imali esiyiqoqile ngenxa yokuthi baningi abantu abebengasebenzi, kanti ngakolunye uhlangothi emaningi amabhizinisi abevalile. Ngeke isakhulunywa-ke eyemboni yezokuvakasha, nokuyiyona ekhahlamezeke kakhulu ngaphansi kwalesi simo esingajwayelekile. Amahhotela avalile kanti itshe limi ngothi ezindaweni zokudlela. Lesi yisilonda esizothatha isikhathi ukuthi siphole.
Yingakho esabelweni sezimali soMkhandlu waseThekwini esiwuR49 billion, simemezele iziphakamiso zokufukula umnotho wethu okhahlamezekile.
Kusukela manje kuyaphambili kuzo zonke izinto ezizothengwa umasipala wethu, asihlehli ekutheni u-30% wazo, kumele kuhlomule abantu bakithi ababencishwe amathuba phambilini. Lapha sibala intsha, abesifazane, ngokunjalo nabaphila ngokukhubazeka. Ngaleli gxathu sikholelwa wukuthi sohamba ibanga elide ekunciphiseni igebe phakathi kwabakhomba ngophakathi nalabo abampofu. Okuyinsila kahulumeni wobandlululo futhi okuyothatha isikhathi ukuthi siyigeze.
Njengomasipala wabantu, ngaphambi kokuthi sethule lesi sabelo mali, savula ithuba lokuthi umphakathi ube nezwi. Sithe singayithola imibono yezakhamuzi sayibheka nokuholele ekutheni sibuyekeze intengo yezidingo.
Phakathi kokunye intengo yokukhokhela izinto ezinjengogesi, amanzi, ukuthuthwa kwendle nemali yentela yedolobha (rates). Sijabula kakhulu ukuthi sikwazile ukwehlisa intengo ukuze abantu bakithi bakwazi ukuphefumula, ngoba kuyabonakala ukuthi itshe limi ngothi.
Ngakho siyacela ukuthi umphakathi usamukele lesabelo mali bese sisebenza ngokubambisana ukucaba indlela eya phambili, nezokwenza ukuthi umasipala wethu akuthole kwehlela ukuthi usihlinzeke ngezidingo ngqangi. Ngakho asikwenze kube yinjwayelo ukuthi sikhokhele ukulethwa kwezidingo esihlinzekwa zona ikakhulukazi laba abasebenzayo phakathi kwethu.
Phakathi kokunye, sikuvezile ukuthi ukulwa nobugebengu sizokusukumela ngazo zombili njengoba izindawo eziningi ngokwezibalo zamaphoyisa, zikhomba ukuthi ziyizizinda zobugebengu.
Kumanje nje sengeze amaphoyisa ethu ngo-600 nokuzosilekelela ekulweni nezigebengu zingabi nendawo ezizocanasa kuyo. Sihlele ukuthi eminyakeni emibili ezayo abe ngu-800 amaphoyisa aqashiwe. Kulolu hlelo kuyohlomula intsha yethu, sonke esaziyo ukuthi ithwele kanzima ngenxa yokuswela imisebenzi. Siyethemba futhi ukuthi izosebenza ngokuzinikela ukugcina imiphakathi yethu iphephile.
Asibe amanxusa okulwisana nokwebiwa kwezinto ezinjengamanzi nogesi, nokudlangile. Lobu busela benza ukuthi umasipala wethu ulahlekelwe imali eningi.
Kusasa leli phephandaba lizoshicilela yonke imininigwane yesabelo mali soMkhandlu, ngakho masizinike ithuba lokusibheka kabanzi.
Konke lokhu kuzophumelela uma sonke sisebenzisana ukulwa nezenzo zenkohlakalo. Lesi sohlava sikuphazamisa ukulethwa kwentuthuko, ngakho kubalulekile ukuthi sisisiphule nezimpande zaso. Kuwumsebenzi wethu ukuthi sibike izenzo zenkohlakalo ngoba uma sithula, sobe sizigwaza ngowethu.
Angibonge bonke abasebenzi bethu, amakhansela nabaholi bomdabu ngokusebenza ngokuzikhandla ukusilekelela ukuze impilo ibe ngcono emiphakathini yethu. Sibonge nobuholi obebungaphambi kwethu, ngesisekelo esakhele phezu kwaso.
Njengoba ukuvalwa kwezwe kwehlele esigabeni sesithathu, asiqikelele ukuthi asibi budedengu. Ukuvulwa kotshwala akusho ukuthi sikhohlwe yile mpi esibhekene nayo bese siyeka ukufaka izifonyo, singakugwemi ukuthintana, ngoba ukwenze njalo, kofana nokufekela ngamathe umsebenzi osewenziwe ukulwa nokubhebhetheka kwegciwane iCorona. Masiqhubeke nokulalela imayalezo kahulumeni, sigade abantwana njengoba besahleli emakhaya.
UKaunda uyiMeya kaMasipala weTheku.