Malundize njalo uKhozi olumaphikophiko
MHLELI: Ngithe angindize ngibuke emajukujukwini njengoKhozi. Kuthe uma ngizwa izindaba ngakhumbula amaqhawe amaningi ayeyibamba ishisa kuKhozi FM.
Ngeke sibakhohlwe oMduduzi Hlophe, KE Masinga, Joshua Mlaba, Zamambo Mkhize, Welcome (Bhodloza) Nzimande noVVO Mkhize, owayeshayela uhlelo Ikhethelo Lasekhaya.
Iningi labasakazi lalingaconsi kubalaleli ngenxa yokusebenzisa ikhono labo.
Kwakunezinhlelo ezazikhonzwe ngabalaleli ngendlela eyisimanga. Kwakunabasakazi ababenothe ngolimi abanjengoThokozani Nene (Igxaba lembadada).
Le nsizwa yagqama kakhulu ngohlelo oluthi Abasiki bebunda.
UKhozi lwalubusisiwe ngamagagu namaciko anjengoCyril Bongani Mchunu (uKansas City, umfana omuhle kunabo bonke abafana emhlabeni).
Le nsizwa yaseMalangeni (eMzinto), yayingaconsi phansi kubalaleli ngenxa yekhono nesiphiwo eyayizalwe naso.
Okwakushiya abantu bebambe ongezansi uthando ayelukhombisa unina, uMaMchunu.
Ngisho esezohamba emhlabeni wayelokhu eqhubekile nokukhombisa uthando kunina, waze wenza ihlaya lokuthi uma esebukwa okokugcina, kuyothi uma sekudlula unina amamatheke.
Kwakunezinhlelo ezazifana noNgidlalele okuwuhlelo olwaluphethwe ngobunono nguMuvo umfokaMaphalala.
Kwakunohlelo olwalukhonzwe ngabalaleli olwaluthi Zakhala izingcingo, olwalethulwa nguKansas City.
Wawuzwa ngephimbo likaMthimkhulu, eKatlehong okuyinsizwa eyayisha amashushu ngalolu hlelo, uyizwe isimpongoloza ithi: “UKansas City lowo, umfana omuhle kunabo bonke abafana emhlabeni?”
Sengiphetha ngithi alundize njalo uKhozi olumaphikophiko olubuka emajukujukwini.