UKadodia akaphumeli obala ngenkontileka kaBrockie
USIHLALO weMaritzburg United, uFarook Kadodia, akaphumeli obala ngokuthi ngabe leli qembu lizomsayina ngokuphelele yini uJeremy Brockie noma lizomdedela azifunele iqembu.
IMamelodi Sundowns okuyiqembu ebelibolekise uBrockie kwiTeam Of Choice, kuvela ukuthi likhethe ukungayivuseleli inkontileka yalo mgadli, nokuthi usengokhululekile usengaqala izingxoxo neqembu alithandayo.
UBrockie usayine namaBrazilians kubhekwe lukhulu kuyena kodwa kwabhimba izinto ehluleka ukuhlohla amagoli nokuholele ekutheni angaliboni elidlalayo esikimini sikaPitso Mosimane.
Akwehlanga kahle kuBrockie ukuboza kwakhe kumaSandawana, njengoba kade ekhala ngokuthi akalinikwanga ithuba elanele lokuziveza.
Ngenxa yezimanga ayezigila esadlalela iSuperSport United, kubathandi bebhola kube lula ukuthi bazwelane noBrockie kwazise iSundowns isizakhele negama elibingokuphuphisa abadlali ngebhentshi.
Kodwa selokhu efike kwiMaritzburg izinto azibuyeli esimeni esidala kuBrockie. Nakhona udonsa kanzima njengoba ukuzethemba kuyinto esamenzela phansi.
Uma uqonda indlela yokudlala kaBrockie, uyakuqonda ukuthi kunamagoli angawabheki kodwa nakuba esewatholile amathuba anjalo kwiMaritzburg ushweba kuphela.
Empeleni uBrockie unegoli elilodwa kwiTeam Of Choice ekubeni efike ngasekuqaleni kwesizini ephezulu.
UKadodia akafunanga ukuphumela obala ngokuthi ngabe bazoziqalisa yini izingxoxo noBrockie ukuba ahlale kwiMaritzburg noma bazomdedela afune ikhaya elisha.
“Kusenzima njengamanje ukuthi singakhuluma ngezindaba zabadlali ngoba sisanda kuqala ukuziqeqesha ngokuphelele. Ngicabanga ukuthi siyoze sikhulume lezo zinto (zokuvuselela, nokudedelwa kwabadlali) ekupheleni kukaJuni,” usho kanje uKadodia.
Umqeqeshi weMaritzburg u-Eric Tinkler, wakuveza ukuthi ukuzethemba yikhona okumenzela phansi lo mgadli odabuka eNew Zealand.
UTinkler noBrockie basebenze kahle besayibamba kwiSuperSport United kumasizini amane edlule.
Ebuzwa uKadodia ukuthi ngokwakhe angakuthokozela yini ukugcina uBrockie, ubambelele ngezidindi, ecasha ngesithupha.
“Njengoba kade ngichazile, lokho asikakukhulumi. Yinto ebengingakayicabangi nhlobo. Ngisacela ukuqonde lokho,” kusho lesi sikhulu.
Okubukeka kungaba yingqinamba ekutheni uBrockie ahlale kwiMaritzburg ukuthi kuthiwa uyikha ngamafosholo imali. Imibiko engaqinisekisiwe ithi ubamba imali elinganiselwa kuR300 000 ngenyanga. Lokhu kungasho ukuthi uma efuna ukuhlala kwiMaritzburg kumele akwamukele ukwehla komholo, kwazise akekho nasefomini enhle njengoba namagoli emphika.