Asizosheshe simemezele okumele kwenziwe: Skhosana
UMENGAMELI we-Athletics South Africa, u-Aleck Skhosana, uthi abazimisele ngokuxhamazela basheshe bakhiphe isimemezelo ngokumele kwenziwe yizifundazwe nabagijimi emuva kokuthi ungqongqoshe wezeMidlalo eNingizimu Afrika, uNathi Mthethwa, ememezele ukuthi abadlali sebengaqala ukuziqeqesha esigabeni sesithathu sikathaqa.
USkhosana uthe igciwane iCorona libucayi kakhulu ngakho kuzomele baqinisekise ukuthi umyalezo abawuthumela abasubathi nabaqeqeshi awubi nomthelela ekutheni kwande ukutheleleka.
UMthethwa umemezele ukuthi abantu abadlala imidlalo okungathintwana kuyo sebengaqala ukuziqeqesha futhi baqhudelane bengabukelwa. Nasemidlalweni okuthintwana kuyo bangaziqeqesha kodwa akuqhudelwana.
“Sesilibhalelile ihhovisi likangqongqoshe sifuna ukucaciseleka kwezinye izinto ukuze nathi sizodlulisa lokhu abakushoyo kuthi nongezwanga kahle sikwazi ukumchazela okuyikhona. Uma sesithole impendulo sizobe sesikwazi ukuthatha isinqumo ngokuzokwenzeka. Into ebalulekile wukuphepha kwabagijimi. Yingakho nathi sisafuna ukucaciseleka kokuthile.”
Ukuvalwa kwezwe kwasho ukuma kwezemidlalo. Phakathi kwemiqhudelwano yezokugijima emikhulu ehoxile yiTwo OCeans Marathon, Comrades Marathon kwama nemidlalo kazwelonke yeTrack and Field lapho abagijimi bebezohlungela ukuzifaka kuma-Olympic. Ama-Olympic obekumele abe eTokyo ngoJulayi asehlehliselwe unyaka ozayo.
“Sisesimeni ezinzima kodwa asikwazi ukwenza isimemezelo nathi singenaso isiqiniseko ngoba lapha sikhuluma ngempilo yabantu. Kumele sazi noma thina siyangena kwabekusho noma cha. Sifuna ukwenza isinqumo esizokwazi ukusimela noma yinini. Uma ngingathi abagijimi abangene emgaqweni (emiqhudelwaneni), kumele ngazi ukuthi ngisho ukuthini ngoba sikhuluma nje asikho isikhwama somshwalense esibhekelele iCovid-19.”
Izinhlangano zezemidlalo zinikwe izinsuku eziwu-14 kusukela ngempelasonto ukuthi zibhalele ungqongqoshe ngezinhlelo zokubuyela ekuziqeqesheni.