Ingwevu iphawula ngesinyathelo sikaMngqithi
INGWEVU edlalele iMamelodi Sundowns eminyakeni edlule u-Alex “Barnes” Bapela, ithi ukuvuselela ngeminyaka emine inkontileka kukaManqoba “TV” Mngqithi kumaBrazilians, njengephini likaPitso “Jingles” Mosimane, kuhumusheka ngokuthi useliphonsile ithawula lokuba ngumqeqeshi ozimele.
UMngqithi ulandele ezinyathelweni zikaMosimane evuselela naBafana Ba Style ngeminyaka emine. Lokhu kusho ukuthi basazoqhubeka nokusebenzisana okuhle benoMosimane osekube nezithelo ezinhle bewola izicoco iminyaka ilandelana.
Ngokusho kukaBapela, uMngqithi unethezekile kakhulu kwiSundowns, kangangoba akasasiboni isidingo sokugcogcoma emaqenjini, okuhambisana nengcindezi.
“Kubukeka sengathi uManqoba useliphonsile ithawula ngokuba ngumqeqeshi ohola iqembu, angabi yiphini.
“Eminyakeni anayo, uma uvusulela inkontileka yokuba yiphini ngeminyaka engaka kusho ukuthi usululahlile ithemba. Lapha asikhulumi nje ngehlathi noma ngomuntu osafunda, sikhuluma ngoqweqwe, futhi umqeqeshi ohlakaniphile onamava aziwayo.
“Ngokumazi uManqoba, akezwani nengcindezi, mhlawumbe ayiningi kangako ingcindezi ekubeni yiphini,” usho kanje uBapela.
Ngo-2009, uMngqithi ugile izimanga enqoba isicoco seMTN 8 esaqeqesha iLamontville Golden Arrows. Empeleni kuze kube manje alikho iqembu laKwaZuluNatal elaphinda lanqoba isicoco kwiPremier Soccer League (PSL).
Kwale kancane kwiMaritzburg
United ukuthi inqobe isicoco, njengoba isihluleke kabili kweyamanqamu. Kumasizini amabili edlule ishaywe yiFree State Stars kowamanqamu kwiNedbank Cup, kanti nyakenye yehlulwe iSundowns kowamanqamu kwiTelkom Knockout. Kwamanye amaqembu aqeqeshwe uMngqithi singabala AmaZulu FC neChippa United.
UBapela uphinde wakhuluma ngokuvuselela kukaMosimane kwiSundowns.
“Bekumele ayoqeqesha ngaphandle kwakuleli ngoba usenqobe zonke izicoco kwiSundowns. Mhlawumbe kunzima kuyena ukuyoqala phansi ufunde abanye abantu, ushintshe nendlela yokudlala.
“Kanti iSundowns uyazi njengoba ezazi. Nangaphakathi waziwa yiwo wonke umuntu kwiSundowns, nokwenza impilo yakhe ibe lula,” kusho uBapela.