UMhango ethubeni lokuyodlala phesheya
ISENGCUPHENI yokupheshukelwa umgadli oyenza ibukeke iphila i-Orlando Pirates, uFrank “Gabadinho” Mhango uma kungukuthi kuyiqiniso okushiwo yimenenja yakhe uMike Makaab.
NgokukaMakaaab obekhuluma ne-Independent Media muva nje, ngeke kwamethusa ukuthi amaqembu ame ujenga emahhovisi ePirates ezofuna uMhango. Lo mgadli waseMalawi unamagoli angu14 kwi-Absa Premmiership, okumenza abahole phambili ngokuhlohlwa kwamagoli.
Kubukeka sengathi ukumiswa kwemidlalo ngeke kumphazamise kangako uMhango ngoba sebekhona vele abamzungezayo yize kumiwe kungadlalwa.
“Akhona amaqembu aseEurope aseqalile ukubuza ngaye. Ngabe ngiqamba amanga uma ngingathi akekho ongibuza ngoMhango,” usho kanje uMakaab.
Ngaphandle kokuthi uMakaab unerekhodi elihle vele ekuweliseni abasuke beshaye inqwaba yamagoli eNingizimu Afrika njengoba enzile ngoCollins Mbesuma noSiyabonga Nomvethe, uMhango uzobe ehamba ezinyathelweni zabagadli abawelela phesheya kwezilwandle ngemuva kokugoduka neLesley Manyathela Golden Boot.
Kuyathusa ukuthi uMhango usephenduke isilomo sePirates ekubeni ufike ekuqaleni kwesizini esuka kwiBidvest Wits lapho ebengagqamile neze khona.
“Okuhle ngaye ukuthi uyazi ukuthi ulapha ekhona ngenxa yePirates. Nalaba abambonayo bambona ngoba ekwiPirates. Noma yini ezokwenzeka ngekusasa lakhe ekupheleni kwesizini izokwenzeka ngesibusisio sePirates emholelayo. Uma kungukuthi uyahamba kufanele zonke izinhlaka zivumelane ngokugcwele,” kucacisa uMakaab.
Ukuwela kukaMhango ngeke nokho kube yinto entsha kwiPirates esiphenduke elinye lamaqembu elibadedela kalula abadlali balo uma befunwa phesheya kwezilwandle.
Nakuba abaningi besakhala ngendlela abathi kuphathwe ngayo udaba lukaThembinkosi Lorch ezinyangeni ezedlule kodwa uMarshall Munetsi, Lyle Forster, Kermit Eramus no-Andile Jali, bonke basuke kwiBucs baya e-Europe.