Kumnyama ngabadutshulwe endlini kubuka abazukulu
BATHUKA izanya abomndeni wakwaZungu emuva kokuba kuhlaselwe abanikazi bomuzi, abathelwe ngoyaba lwezinhlamvu Ezinhlabeni, KwaHolinyoka, KwaNongoma.
UNkk Qomenkulu Zungu noMnuz Zwelimpi Zungu, badutshulwe phambi kwabazuluku babo, ngoLwesibili ebusuku.
Indodana yababulewe uMnuz Thembisani Zungu ithe bayasaba ngoba abazi kungani abazali bebulewe.
“Angazi kungani behlaselwe. Kuthiwa kufike abantu ababili babuza umama, okulandele lapho kube yinhlamvu. Bekukhona abashana endlini kodwa bangabenza lutho. Baqede ukudubula baphuma endlini babaleka. Siyesaba ngoba asazi kungani bebulewe,” kusho uZungu.
Elandisa uthe kube umzuzwana nje abasolwa bengene egcekeni lakubo babe sebebaleka.
“Bengisendlini yami, ngabo6 ngizwe kuqhuma sengathi kukhona oshaya uthayela. Ngibone umuntu ephuma endlini kababa nomama. Babe sebecasha ngesibaya. Ngibone izingane ziphuma zibaleka. Bese bedubulekile.
Sithole amagobolondo ayisishiyagalolunye ezinhlamvu. Babili abantu okuthiwa bangene endlini badubula,” kusho uZungu. Uthe kunzima ukuqagela ukuthi kungani bebulewe ngoba uyise kade abuya eGoli lapho ayesebenza khona. “Akukho nabakuthathile, bafike bababulala base bebaleka,” kusho uZungu. Uthe bayafisa ababulali baboshwe ukuze bezothola isizathu sokubulawa kwabazali bakhe. Okunye okuphawulekile wukuthi amaphoyisa afike endaweni yesigameko athatha amagobolondo amahlanu, kuthe sekufika omama bendawo bezohlanza indlu abadutshulwe kuyo bathola amanye.
“Omama bendawo abebehlanza indlu bawathathile amagobolondo bawaphonsa endlini yangasese namanzi abegcwele igazi. Bebengazi ukuthi asengasetshenziswa amaphoyisa,” kusho uZungu.
Abazukulu bababulewe uthe basathukile emuva kokubuka bebulawa phambi kwabo.
Okhulumela amaphoyisa KwaZulu-Natal uCaptain Nqobile Gwala, uthe kuphenywa amacala okubulala amabili esiteshini saKwaNongoma, uphenyo lusaqhubeka.