Basengcupheni abaphelelwa yizinkontileka
BASENGCUPHENI yokuhlala izinyanga ezimbili bengaholi abadlali abasesimeni esifana nesikaGeorge Maluleka, okuthe kungakapheli isivumelwano abenaso neKaizer Chiefs yavele yangazihlupha ngisho nangokusebenzisa uphawini wokumgcina, kuze kube kuqedwa isizini.
Lokhu kushiwo nguGlyn Binkin (oyimenenja yabadlali ehlonishwa umhlaba wonke) ngasekuqaleni kwesonto ephawula ngabadlali abaphelelwa izinkontileka (ngoJuni 30 ku-2020) ngaphansi kwesimo segciwane, iCorona.
Kunenqwaba yabadlali ephelelwe izinkontileka kodwa ngalo phawini weFifa wokulula izinkontileka kuze kube kuqedwa ngokusemthethweni amasizini, abanye bazoqhubeka basebenze bahole ekupheleni kwenyanga.
Inkinga ingaba kulaba abafana noMaluleka abadedelwe amaqembu abo sakubaduba. NgokukaBinkin sekungasiza iMamelodi Sundowns ngokuthi imsayinise manje ngokugcwele uMaluleka, ingalindi kuze kuphele isizini (okungakacaci nanokuthi izoqhubeka noma cha).
UMaluleka usayine inkontileka yesibambiso neSundowns kodwa leli qembu belingakamethuli ngokugcwele. NgoLwesibili iChiefs ikhiphe isitatimende icacisa ngokuthi yize isazoqhubeka nemidlalo yeligi, uma kugcina kwenzeka lokho kodwa uMaluleka uzobe engasekho ekhempini yayo.
“Inkinga ukuthi abadlali abangeke bavumelane namaqembu abawashiyayo ukuthi kusayinwe isivumelwano esifushane, bangase bahlale bengasayinile kuze kube uSepthemba sonke esifisa kube sekuqediwe ngawo kuwona wonke amaligi.
“Kubukeka kulula ukuthi abadlali bangaxoxa namaqembu ababevele bewadlalela kodwa kusemqoka ukukhumbula ukuthi akusemnandi manje. Laba badlali bancengiwe ukuthi “bavuselele izinkontileka kodwa abangavuma. Lokhu kungadala ubutha kanti neFifa ibingakaphumi nezwi eliqondile lokuthi iluphi usuku okufanele wonke amaligi abe esephelile. No-Agasti 31 siyawuqagela,” kusho uBinkin.
Omunye umdlali omqoka ophelelwe inkontileka izolo uGrant Magerman naye oya kwiDowns. Uhlukile kodwa uMagerman kunoMaluleka ngoba yena welulile ne-Ajax Cape Town ngenhloso yokuyisiza ibuyele esigabeni esikhulu.
I-Urban Warriors iyona ezihola phambili kwi-log yeGladAfrica Championship nayo osekusele imidlalo embalwa ukuthi iqedwe njenge-Absa Premiership.
Omunye umdlali ongase ahlale engaholi kulezi zinyanga uSiyanda Xulu ovumelane neMaritzburg United ukuthi abahlukane manje kungaze kulindwe ukuthi kuphele isizini.