U-DJ Le Soul uchitha inhlamba engomeni yakhe
U-DJ Le Soul uthi izinhlamvu zengoma yakhe entsha aziyona inhlamba njengoba abanye abantu becabanga. ULe Soul ophinde abe ngumsakazi weGagasi FM, usanda kukhipha ingoma entsha ethi Amabele apike kuyo iDeep Narratives, Blaqrhythm noTNS.
“Ingoma ikhuluma ngamabele esiwasebenzisa uma senza utshwala besiZulu. Sikhuluma ngamabele nomthombo hhayi amabele nobuntu bowesilisa njengoba abanye sebesho. Yize kukuhle ukuthi kwenza bantu bakhulume ngeculo kodwa alisho lokhu abanye abakucabangayo ngoba baze bathi alivalwe emisakazweni,” kusho uDJ Le Soul.
Amabele yingoma yakhe yokuqala ephume esitebeleni sikaBlack Coffee, iSoulistic Agency njengoba phambilini ayezimele.
“Ukusayina kwami noBlack Coffee ngakwenza ngoba ngifuna ukungenisa kakhulu phesheya. Ngifuna ukuqala e-Afrika ngaphambi kokuwelela phesheya ko-Ibiza eSpain nakwezinye izindawo. Sekuyaqala kancane iminyango iyavuleka ngale ngoma ngoba kuneziteshi zako-Italy nakwamanye amazwe eziyicelayo,” kuchaza yena.
Uthe iDeep Narratives yafaka isiqeshana sengoma kwiTwitter wabe eseyayicela ukuthi ayisebenze.
“Ngayithanda ngoba kade ngayigcina i-tribal house. Ngathi sengiphelelwe amaqhinga ngafonela uBlackrhythm wathi angize nayo eDistruction Records. Waqhubeka nayo waphelelwa amaqhinga kanti kuzofika uTNS estudyo wayizwa wabe eseyacula. UZakes Bantwini wayizwa esestudyo noBlackrhythm wayithatha wayoyidlala kubantu. Kwaba ukwethulwa kwayo emphakathini.”
Uthe kusuka lapho wathola ingcindezi yokuthi ayikhiphe yize ayengahlelile ngoba wayenenye ayefuna ukuyikhipha.
“Kube ukuqondana kwezinto nje ukuphuma kwale ngoma. Ngiyaqala ukuba nengoma ethandwa abantu kangaka nokuba yibo abayicelayo. Mina benginenye ebese ngicele abazi kangcono ukuthi bangizwele ukuthi abantu bangayithanda yini. Bengizokhipha yona ne-EP kodwa konke lokho sekumile sesiphusha Amabele. Okunye sizokubona ngonyaka ozayo.”