Kuhlehliswe umngcwabo kaNgcongca
UKUGULA kukanina wowayewumdlali weBafana Bafana neMamelodi Sundowns u-Anele Ngcongca, kuphoqe umndeni ukuthi uhlehlise umngcwabo wakhe obekulindeleke ukuthi ube namuhla.
Lokhu kumenyezelwe wudadewabo walesi sihlabani uNksz Siyasanga Ngcongca ekhasini lakhe likaTwitter izolo, nalapho kuvele khona ukuthi usuzoba ngoLwesine oluzayo.
“Umngcwabo ka-Anele siwuhlehlise ngoba umama akaphilile. Umngcwabo ngeke uqhubeke engekho ngakho siwumndeni sinqume ukuthi impilo yakhe ibaluleke kakhulu,” kusho uNksz Ngconga.
Lo mdlali ushone engozini yemoto eyenzeke emgwaqweni uN2 ngaseMthunzini ngesonto eledlule. Babebabili emotweni, yena washonela khona lapho kwathi ayehamba naye wangeniswa esibhedlela elimele kabi.
UNksz Ngcongca ukhwele wadilika kuNgqongqoshe wezeMidlalo kuzwelonke uMnuz Nathi Mthethwa, ngokungawushayeli umndeni noma awuvakashele njengoba usemanzini.
“Kubuhlungu ukuthi akakaze axhumane nomndeni ka-Anele ekubeni impilo yakhe igujwa naphesheya. Ubengumdlali ohlonishwayo odlale nasemqhudelwaneni weNdebe yomhlaba. INingizimu Afrika yonke imzilele.”
Uthe abantu baselokishini iGugulethu, eCape Town lapho kudabuka khona umdlali baphoxekile yisenzo sikaMthethwa ekubeni uNgcongca emele iqembu lesizwe.
Ugxeke noNgqongqoshe wezamaSiko neMidlalo eWestern Cape uNksz Anroux Johanna Marais, athe naye akukho ake wakusho emndenini ngokudlula emhlabeni kwalo mdlali.
Uthe wuNgqongqoshe wezokuThutha kuphela uMnuz Fikile Mbalula, ovakashele umndeni ezobhonga emswaneni.
Iqembu laseBelgium ayelidlalela i-KRC Genk, limhloniphe ngokuthi ijezi eliwunombolo-16 lingabe lisagqokwa kuleli qembu adlala kulo imidlalo eyevile ku-279.
Imizamo yokuthola ihhovisi likaMthethwa ukuze liphawule ngalolu daba ayiphumelelanga, kuze kwashaya isikhathi sokushicilela lingakaphenduli.
Ekhuluma kwiMetro FM okhulumela uMthethwa uNkk Masechaba Ndlovu, uthe akulona iqiniso ukuthi abazange bakhiphe isitatimende sokudlulisa amazwi enduduzo emndenini kaNgcongca.
Uthe uMthethwa umise izinhlelo zokuyobona umndeni ngoba unina ka-Anele uneCovid-19, okwenze kwahlehla nomngcwabo.
“Sidlulisa amazwi enduduzo emndenini ngokwenzekile. Ungqongqoshe unxuse udadewabo ka-Anele ukuthi ayeke ukwenza izitatimende eziwubudedengu, futhi kumele azihoxise njengoba ekhuluma nasemisakazweni. Umndeni kukhona imali oyitholile ngokushona kuka-Anele,” kusho yena.