Icikekile imeya ngabafuna amathenda ngobudlova
KUSOLWA osonkontileka abangeneme ngokungawatholi amathenda, ngezigameko zokucekelwa phansi kwempahla kaMasipala weTheku.
Kamuva nje kuvalwe i-valve yedamu lamanzi eCato Manor, eliphakela idolobha iTheku nemiphakathi elizungezile esehlweni sangoMsombuluko ekuseni.
IMeya yeTheku, uMnuz Mxolisi Kaunda, isigxeke yangahloniza lesi senzo, esichaze ngobugebengu.
UKaunda uthe izigilamkhuba zivale i-valve, yasikwa kwenzelwa ukuthi kungabi khona ozokwazi ukuyilawula ukuze amanzi aphume.
Uqhube wathi ngosuku lwesehlo bahlangane nabasebenzi bomkhandlu, kwavunyelwana ngokuthi kuzovulwa amacala emaphoyiseni.
Njengamanje umkhandlu ukhuluma nabaholi bamaphoyisa KwaZulu-Natal, ukuze kungenele ubunhloli bakhona ukuze kuzoboshwa abathintekayo, babhekane nengalo yomthetho.
“Uma ngabe unezimoto zamanzi, okuthi uma kuvalwe amanzi usizakale ngoba ufuna imali kaDisemba, musa ukuyonqamula ingqalasizinda kamasipala ngoba ufuna siqashe izimoto zakho zamanzi,” kusho uKaunda.
Umkhandlu usezinhlelweni zokwengeza isibalo samaloli awo athuthela umphakathi amanzi, bese uqasha abantu abazosebenzela umasipala.
Lokhu umasipala ukwenza ukuze ugweme ukuthembela kosonkontileka abazimele, uKaunda athe yizo lezi kwesinye isikhathi ezivala ama-valve khona kuzoqashwa zona.
Uthe babe nenkinga enkulu edolobheni, amanzi engekho ngoba leli damu liphakela izindawo eziningi.
Ucele abangawatholanga amathenda eThekwini ukuthi bangalokothi baye kwingqalasizinda yomkhandlu beyoyicekela phansi. Uthe kubalulekile ukuthi abantu balinde, kulandelwe imigudu yezomthetho yokukhishwa kwamathenda. “Uma sikuyeka singenzi lutho ngalokhu, zizoqhubeka njalo lezi zenzo. Esikujabulelayo wukuthi singenele ngokushesha, sawabuyisa amanzi ngokuphazima kweso,” kusho uKaunda.
Kuphoqeleke ukuthi umkhandlu uxolise emphakathini futhi uwubikele ngokushesha ukuthi yingani amanzi ungenawo.
Phambilini kunosonkontileka abathuthela umasipala amanzi abasabisa ngokukhinyabeza indlela okuhanjiselwa ngayo umphakathi amanzi uma umkhandlu uqhubeka nokubancisha amathenda.