Ikomiti lichitha ukuguqulwa komthetho wokhetho
IKOMITI elibhekele ukusebenza koMnyango wezaseKhaya ePhalamende, liyakuchitha ukuguqulwa komthetho wokhetho obekuzonika inhlangano eyengamele ukhetho igunya lokushintsha indlela esetshenziswa uma kuvotwa.
Ikomiti selithathe isinqumo sokukhipha isigaba-12 nesika-14 somthetho wokhetho, njengoba kulungiselelwa ukhetho lohulumeni basekhaya oluzoba ngonyaka ozayo.
Izigaba ebezihlongozwa, bezizonikeza i-Independent Electoral Commission (IEC) igunya lokuqhamuka nendlela entsha yokuvota.
I-IEC ibizimisele ngokuhlola ukuthi kungaba yimpumelelo ukuvota kusetshenziswa ezobuchwepheshe.
Esitatimendeni uSihlalo wekomiti uMnuz Bongani Bongo, uthe banqume ukukhipha lezi zigaba kwizichibiyelo ezihlongozwayo.
“Sibe nohlelo olunzulu lokulalela uvo lomphakathi lapho sithole khona izethulo eziwu12 305 nezingu-28 ebeziqhamuka ezinhlakeni ezehlukene. Zibe ziningi izikhalo. Emva kokulalela izikhalo, ikomiti lithathe isinqumo sokususa isigaba 12 nesika-14 somthetho. Ikomiti liyakholelwa ekutheni udaba lwendlela esetshenziswayo uma kuvotwa luwudaba lwenqubomgomo esingeke siluyekele kwi-IEC kuphela ukuthi kube yiyo ethatha isinqumo.”
Uthe: “Akukhathaleki noma ngabe i-IEC ibithi isafuna ukuhlola kuphela ukuthi yiziphi ezinye izindlela ezingasetshenziswa ukuvota.”
Abantu abaningi abaphawulile bakhale ngokuthi uhlelo lokuvota ngezobuchwepheshe lungaba sengcupheni yokuthi kube khona inkohlakalo emiphumeleni yokhetho.
UBongo uthe ikomiti lizophakamisa ukuthi iPhalamende lihambisane neziphakamiso zekomiti.