Obeyiphini lenhloko yoKlebe ejele
I-SPECIAL Investigative Unit (SIU) ifuna ishushiswe imenenja kamasipala uMgungundlovu uDkt Ray Ngcobo, mayelana nodaba lwenkohlakalo ekukhishweni kwamathenda ezigidi zamaRandi kulo masipala.
Uphenyo lwalolu phiko oluphenya amacala abucayi, luthole ukuthi kwaba nobudedengu ekukhishweni kwamathenda ezigidi kulo masipala phakathi kuka-2017 no-2018.
Ngokombiko othulelwe ikomiti elibhekele ukusetshenziswa kwemali yomphakathi esiShayamthetho KwaZulu-Natal, iStanding Committee on Public Accounts, uphiko seludlulise amacala amabili ophikweni
UGWETSHWE iminyaka eyisishiyagalombili ebhadla ejele owayeyiphini lenhloko yoKlebe KwaZuluNatal, ngamacala amabili enkohlakalo ngokwamukela intshontsho likaR28 000.
USimon Mzayifani Madonsela, owayenguBrigadier, ugwetshwe ngamacala athinta imali enkantolo eThekwini ngoLwesibili.
Ubengaphandle ngebheyili kaR5 000 emuva kokuboshwa ngo-2015 ngamaphoyisa eNational Intervention Unit.
Kuthiwa uMadonsela wakhokhisa izelamani, uMohamed no-Ismail Shaik ukuze ezoqinisekisa ukuthi alivalwa idokodo ngophenyo loKlebe, mayelana nokunyamalala okwakungaqondakali kukadadewabo walezi zelamani.
Kuthiwa uphiko lukaMadonsela lwalukade luphenya ngaleli cala, kanti luzogcina luvala idokodo. Okhulumela iNational Prosecuting Authority (NPA), KwaZulu-Natal, uNkk Natasha Kara, uthe uMadonsela waya kulo mndeni wawutshela ukuthi abamphethe bebefuna ukuvala idokodo ngakho ufuna uR40 000.
“Wafuna le mali etshela umndeni ukuthi khona ezoqinisekisa ukuthi idokodo kalivalwa. Watshela umndeni ukuthi lukhona unakekelo oluphezulu oluvela kuyena yize idokodo lase livaliwe,” kusho uNkk Kara.
Umndeni kawukwazanga ukukhokha imali eyayifunwa wuMadonsela kodwa wamnikeza uR25 000.
Ngokuhamba kwesikhathi wabuye wafuna inkokhelo kaR3 000, umndeni wayikhokha.
UMbuso wathi inkokhelo yokuqala yenziwa ngoSepthemba 21, 2010, eyesibili yaba ngo-Okthoba 4, 2011.
UNkk Kara uthe umndeni wathukuthela ngenxa yokugqoza kophenyo, wavulela uMadonsela icala.
UMadonsela ubelokhu ephekwa ngebhodwe elincane enkantolo wuMshishisi u-Advocate Abbey Letsholo kwaze kwaba liyamgojela icala.
Inkantolo inike uMadonsela igunya lokuphonsela inselelo ukulahlwa ngecala kwakhe okulindeleke ukuthi kube kusasa.