Akungazitshwa uma umuntu ekhombisa ukuphazamiseka
SIYANCOMEKA isinqumo sokuthi kumele ihlolwe ingqondo indoda engene enkantolo ishaya ngesudi yesele. UMnuz Mndeni Majozi (36) waseThembalihle, eMtshezi, usolwa ngokubulala indodana yakhe uZaziwa Majozi (3) ngeledlule.
UMajozi uvele enkantolo ngoMsombuluko enqunu futhi ekhuluma izinto ezingaqondakali kwase kuthiwa makayobhekwa isimo sengqondo.
Le ndoda isolwa ngokubulala ingane yayo yashayelela isipikili ekhanda maqede yayicwiya – yayisika nolimu.
Izitho zesidumbu sikaZaziwa zitholwe sezifakwe esikhwameni endlini kaMajozi, isidumbu satholwa ehlathini eliseduze komuzi.
Ngesikhathi evela enkantolo kuthiwa ubebuzwa okunye, aphendule okunye.
Kuthiwa uke watshela imantshi ukuthi udadewabo ushadile futhi uhlala emzini wakhe, kade ingambuzanga lokho.
Umndeni uthe uMajozi uqale ngeledlule ukukhombisa izimpawu zokungaphili kahle ekhanda. Kuthiwa abasemsebenzini wakhe bambuyisele ekhaya ngoba bese ebaphakamisela isandla abanye abasebenzi.
Ngesikhathi esolwa ngokubulala ingane kuthiwa uwuchithile umndeni wathi ubulale iselesele.
Okwenzeke lapha kusikhumbuza sonke ukuthi kumele sinakelele amalungu emindeni yethu uma enezimpawu zokungathathi kahle.
Kubalulekile ukuthi sisukumele phezulu sifune usizo ngoba ukuthalalisa kugcina kunemiphumela emibi.
Nabalapho kusebenza khona uMajozi bekumele bamfunele usizo ngaphambi kokumbuyisela emndenini wakhe. Isinqumo sokumbuyisela ekhaya ngaphandle kosizo sibe nobudedengu.
Imindeni inelungelo lokubiza amaphoyisa asize uma ilungu lomndeni okusolakala ukuthi liphazamisekile engqondweni liba nodlame. Kufanele amaphoyisa enze isiqiniseko sokuthi lowo muntu uyiswa esikhungweni sezempilo esifanele ukuze athole usizo.