Usathuswa yimpumelelo yohlelo lwakhe emsakazweni
UMA kukhulunywa ngezinhlelo ezihamba phambili esiteshini somphakathi iNongoma 88.3 FM, alusali ngaphandle olomculo wamaZayoni olubizwa ngokuthi Asambe Msayoni ngamaSonto phakathi kuka-10 ekuseni no-12 emini.
Uma seluqalile lolu hlelo abazalwane, ikakhulukazi abayiZayoni, bacishe bafike sekudlule isikhathi sokungena kwenkonzo emabandleni abo.
I-Asambe Msayoni wuhlelo olusakazwa yintokazi uNomvelo “Isithamuthamu SamaZion” Zulu. Lo msakazi udabuka khona KwaNongoma endaweni yaseBhanganoma.
Uthe kuyamethusa kakhulu ukungaconsi phansi kohlelo lwakhe ekubeni lungangeni ekuseni noma ntambama phakathi nezinsuku.
UNomvelo (32), oseneminyaka eyibambile endimeni yokusakaza, uthi ugqozi waluthola kowayesakaza uhlelo lwasekuseni oKhozini FM, uSbonga Mngadi.
Akathathi amashansi kulo mkhakha kodwa wenza izifundo zokuxhumana nomphakathi eDurban Commercial College eThekwini, emuva kokuphothula uGrade 12 eSamukelo High, eNewcastle.
Uthe noma angathola muphi umsebenzi kodwa akasoze ahlukana nokusakaza ngenxa yokuthi lo msebenzi usegazini nasemithanjeni yakhe.
“Ngizibona ngiya kude kakhulu ngekhono lami. Sengize ngangena nasemkhakheni wemicimbi ehlukahlukene ngenxa yalo leli khono.
“Abantu bayayithakasela kakhulu imicimbi yami ngoba ihlanganisa abantu endaweni futhi isusa abantu abasha ezidakamizweni nasemikhubeni engasile.”
Uthe uyafisa ngelinye ilanga ukuba kube nomsakazo kazwelonke ozogxila emculweni nasezinhlelweni zomculo waseZayoni.
“Ngikusho lokhu ngenxa yokuthi maningi amabandla ayiZayoni kuleli. Baningi abathanda umculo weZayoni kodwa abaphuthelwayo yiwo ngenxa yokuthi udlalwa kakhulu ngamaSonto,” kuphetha uNomvelo okhonze ukudla iPizza nePasta ngenxa yokuthi kumphatha kahle esiswini.
Ngaphandle komculo waseZayoni nowokholo jikelele kodwa uma eziphumulele ukhonze ukulalela umculo opholile ongasoze wabuna.