Ibhodla umlilo induna ingaholelwa
KAYISAZI ukuthi sekumele yenzenjani induna yaseMkhuze, eMkhanyakude, ngaphansi kobukhosi bakwaNsinde, osekuphele iminyaka emibili ingawutholi umholo wayo.
UMnuz David Gumbi, uthe isiqala ukumnenga manje indaba yokungaholi kwakhe.
“Uyabona manje sengikhathele ukulindiswa into engekho. Mina ngigcine ukuhola ngo-Agasti 31, 2018.
“Ngibona kahle ukuthi laba bantu kabanendaba nami futhi kabanendaba nanomndeni wami. Bacabanga ukuthi izingane zami zidlani uma uyise engaholi?” kusho uGumbi, egcizelela ukuthi useze waphelelwa nayisithunzi kubantwana bakhe.
Eqhuba uthe abantwana bakhe abababili sekuze kwaphoqeleka ukuba abakhiphe enyuvesi njengoba ebhekene nengwadla yokushoda kwemali ekhaya.
Uthe nenkosi yendawo uSfiso Myeni iyalwazi usizi lwakhe.
“Inkosi seyizame yehluleka nayo ukungisiza kule nkinga engibhekene nayo. Nayo sebevele bayikhohlise bathi ngizoyithola seyiyonke imali yami. Kodwa lutho njengoba namanje kusathulekile nje,” usho kanje.
Isolezwe likhulume nayo inkosi, yaluvuma udaba ukuthi iyalwazi.
Ithe seyenze konke okusemandleni ayo ngenhloso yokutakula induna yayo kodwa yonke imizamo yayo iyafenya.
“Angiqondi kahle ukuthi kwenzekani. Phela akukho esingazange sikwenze okumayelana nalolu daba. Nayo induna iyazi ukuthi sengizame kaningi ukukhuluma nabomyango kodwa namanje kusefana nje.”
Okhulumela uMnyango wezokuBusa ngokuBambisana KwaZulu Natal, uMnuz Senzo Mzila ucele ukuthunyelelwa umyalezo ogcwele mayelana nalolu daba ukuze ezolulandela.
Uthembise ukuthi bazokwenza uphenyo olubanzi ngalo.