Kuhlomule abezinhlelo zeHIV kuleli
UHULUMENI wase-United States uyaqhubeka nokuxhasa ngemali izinhlangano ezingenzi inzuzo ezenza umsebenzi wokuvikela, ukusiza nokwelapha abaneHIV eNingizimu Afrika. Usebenzisa isikhwama i-U.S. President’s Emergency Plan for Aids Relief (U.S Pepfar).
I-U.S Pepfar muva nje inikele ngoR3.7 million onikezwa izinhlangano ezinhlanu ezilwa negciwane eThekwini, eMgungundlovu, yabuye yanikelela ezinye ezintathu eHarry Gwala nasoGwini kanjalo naseKing Cetshwayo.
Izihlangano ezihlomule kulesi sikhwama ziyingxenye yezinhlangano ezingu-49 zakuleli, ezizothola uxhaso kulesi sikhwama ezizoxhaswa ngoR750 000 inhlangano ngayinye. Isiyonke imali ekhishwe yilesi sikhwama ezonikezwa lezi zinhlangano inguR36 million.
Lezi zinhlangano zenza izinhlelo zokuhlola abantu ukuthi kabanayo yini iHIV, ukuze bazi isimo sabo.
Ngezinhlelo zabo kulindeleke ukuthi kuhlolwe abantu abangu-48 000 kuleli, okuzosiza uMnyango wezeMpilo ekutheni ukwazi ukuhlola abantu abaningi.
Lezi zinhlangano zibuye zenze izinhlelo zokunakekela abesifazane abasebancane, abalinganiselwa ku-10 000.
Izinhlangano zaseThekwini ezihlomule kulesi sikhwama, yi-Amadlelo Community Development Organisation esenyakatho yeTheku, eFolweni Community Resource Centre, eseFolweni, iNompumelelo Institute of Leadership eseNsimbini, iNurses at a Go eseLuganda, iShap Shap Cinemas eseHammarsdale.
UMnuz Nicholas Hersh, iPhini lokhulumela i-US
Embassy kuleli, uthe i U.S Pepfar, iyawubona umsebenzi owenziwa yizinhlangano zomphakathi ekulweni negciwane futhi ifisa ukuthi ziqhubeke nokuwenza ngoba yizo ezikwazi ukubona abantu ezibasizayo nsuku zonke.
UMnuz Zimele Mkhize weNompumelelo Institute of Leadership, uthe kubajabulise kakhulu ukuthi baxhaswe yisikhwama.
“Imali esixhaswe ngayo izosisiza ukuthi sikwazi ukuqhubeka nezinhlelo zethu zokulwa nesihlava sokuhlukunyezwa kwabesifazane, ezokunqanda ukusabalala kweCovid-19, ezokuvikela ukuthi kube nabantu abasha abatheleleka ngeHIV, ukunakekela nokweseka asebenalo leli gciwane kakhuluka abesifazane abasebencane nabafana,” kusho uMkhize.
UHersh uthe i-U.S Pepfar selokhu yaqala ukubambisana nohulumeni wakuleli ezinhlangano ezingenzi inzuzo emkhankasweni wokulwa neHIV ngo-2004, isinikele ngemali engaphezu kukaR100 billion.
Kusuka ngalesi sikhathi iPepfar ithi zingu-1 250 izinhlango ezingenzi inzuzo ezisebenza emiphakathi, ezihlomule ngokuxhaswa ngezimali
“I-Pepfar izibophezele ekuqinisekiseni ukuthi abantu baseNingizimu Afrika bathola ithuba lokuphila impilo ende, bakwazi ukuqhubeka nezinto ezibalulekile empilweni,” kusho uHersh.