Abavela kwiDowns bamukelwe ngenjabulo
SISHABALELE isifiso sokudla ijezi kule sizini esitobheni seMamelodi Sundowns, uNyiko Mobbie, okuvele ukuthi usebolekiswe kwiChippa United.
UMobbie, oyibamba emuva kwesokudla, ubolekiswe kwiChilli Boys noLuvuyo Phewa osayine kwiSundowns esuka kwiReal Kings kwiGladAfrica Championship ngaphambi kokuqala kwesizini.
Ngesizini edlule uMobbie ubekade ebolekiswe kwiStellenbosch eqeda kusayina inkontileka eChloorkop.
Ngasekupheleni kwayo uthe uzibona esekulungele ukubanga ijezi noThapelo Morena odlala nakwiBafana Bafana no-Anele Ngcongca ongasekho.
Esitatimendeni sokwamukela laba badlali, umqeqeshi weChippa uLehlohonolo Seema, uthe bangena khaxa esitayeleni sabo.
“Ngijabule kakhulu ngokufika kukaNyiko noLuvuyo esikwatini sethu, engicabanga ukuthi bazokhathula indima ebonakalayo eqenjini.
“Laba badlali ababili abasebancane bangena khaxa endleleni esidlala ngayo nesikufunayo kule sizini,” kusho uSeema.
UMobbie ubolekiswe kwiChippa nje, iStellenbosch ibikade ifuna ukumthenga kodwa iSundowns yanqaba naye. IStellies igcine ivale isikhala sakhe ngoZitha Macheke obedlala kwiBidvest Wits.
Emdlalweni awudlalile uMobbie kwiSundowns ibhekene neBloemfontein Celtic KoweMTN 8, udale i-free kick eholele ekutheni iPhunya Sele Sele ishaye igoli egcine iwine ngalo. Emuva kwalokho akaphindanga wadlaliswa.
“Kuyibhadi ukuthi sidlalise kabi umuntu esimeni ebesingeyona ingozi. Kuyibhadi futhi ukuthi igoli lishaywe ngomunye wabantu ebesikhulume ngabo.
“Uvelelwe wumshophi uMobbie ngokuthi adlale kabi. Ngicabanga ukuthi uzame ngokweqile,” washo kanje umqeqeshi weSundowns, uManqoba Mngqithi emuva komdlalo.
NgeSonto iChippa esanqobe umdlalo owodwa kwemihlanu yeligi, izovakashela iBaroka FC ePeter Mokaba Stadium ngo3.30 ntambama.