Ibhentshi lishintshe izinhlelo zomdlali
UMDLALI weMamelodi Sundowns, uPhakamani Mahlambi obelekiswe kuMaZulu kuze kuphele isizini, udalule ukuthi ubalekiswe yibhentshi kulabo mpetha beligi.
UMahlambi waseNgoje, eVryheid, ubengakaze asinuke isikimu kwiSundowns selokhu kuqale isizini.
UMahlambi (23) ubengenye yezintandokazi zomqeqeshi uPitso Mosimane okubukeka zizothwala kanzima njengoba engasekho eChloorkop. Ngesonto eledlule kuvele ukuthi bazochithwa abadlali okukhona u-Anthony Laffor noTiyani Mabunda.
Laba badlali nabo abasazi isikimu ngaphansi kwabaqeqeshi asebephethe eChloorkop, uManqoba Mngqithi, uRhulani Mokwena noSteve Komphela.
ULaffor yena olule inkontileka ngesizini edlule kade aqala ukuba yisibukeli njengoba nangaphansi kukaMosimane ubengabonwa enkundleni.
UMahlambi, owethulwe ngokusemthethweni ngoLwesibili nonozinti uVeli Mothwa osuka kwiChippa United, uthe kumcacele ukuthi isikimu sikude naye.
“Ngibe nengxoxo nomqeqeshi uManqoba Mngqithi. Ungitshele konke ngaqonda. Inhloso yami bekuwukushiya ngiye eqenjini lapho ngizodlala khona ukuze ngibuyele ekubeni nguPhakamani abantu abamaziyo,” kusho UMahlambi.
Ukungadlali kukaMahlambi kwiSundowns selokhu kuqale isizini kuholele ekutheni angabizwa eqenjini lika-Under 23 ebelidlala eyobugani neSaudi Arabia ngenyanga edlule njengoba lizicijela ama-Olympic angonyaka ozayo eJapan.
Phambilini ubehlezi ekhona esikimini sikamqeqeshi ka-Under 23, uDavid Notoane.
UMahlambi ukhulele enkulisa yeBidvest Wits, wazakhela igama kuyona eminyakeni edlule. Ubeshaya into ecokeme nasemaqenjini esizwe amancane. IZitshudeni zimdayisele I-Al Ahly ngo-2017 kodwa zangamhambela kahle izinto. UMosimane unqume ukumlanda ngo-2018.
KuMaZulu uzojoyina abanye abadlali abasezingeni eliphezulu abasayiniswe ngabaphathi abasha.
Kulaba badlali kukhona uSiphiwe Tshabalala wodumo kwiKaizer Chiefs, Siphelele Mthembu odlalele iChiefs ne-Orlando Pirates, Luvuyo Memela, Augustine Mulenga noXola Mlambo abasuka kwiPirates.
“AmaZulu anabadlali abahle kakhulu. Abanye babo ngikhule ngibabuka. Manje kuzoba yinjabulo kimina ukusebenza nabo. Ngithemba ukuthi bazongisiza ngifinyilele ezingeni elifanele,” kusho uMahlambi.